Fatin Konstrusaun Edifisio PN Foun Seidauk Fiksu

Governu seidauk identifika fatin (rai) ne’ebe apropriado atu halo konstrusaun ba edifisio Parlamentu Nasional foun ne’ebe planea ona tan ba espasu atu hariiedifisio estado barak mak okupa husi komunidade.

Vise Presidente Parlamentu Nasional, Aderito Hugo da Costa hateten iha espasu balun mak governu hare ona hanesan iha Hera, aeroportu antigun iha palasio president nia kotuk no iha Tasitolu maibe kansela tanba fatin ne’e ba atu dezenvolve sai segundu largo. 

Nia haktuir konstrusaun edifisio parlamentu foun ne’e mega projetu presiza tempu atu estuda no analiza didiak hodi nune’e edifisio ne’ebe le projeta to’o iha tinan 25-50 anos mai.

“Ita hakarak edifisio ida ne’ebe reprezenta orgaun legislative iha futuru no bele koresponde nesesidade parlamentu nian ba tinan 50 mai.Tanba ne’e prosesu neneik,” dehan Vise Hugo iha Parlamentu Nasional, Dili.

Nia hatutan fasilidade ne’ebe agora dadaun parlamentu iha ne’e limitado tebes maibe situasaun obriga sira tenke uza fasilidade sira ne’e ho masimu hodi halao servisu.

“Ita bo’ot sira hare espasu ba edifisio estado nian ne’e limitado tebes tanba rai estado nian barak mak ita nia povu okupa hela atu halo liberta deit ida ne’e mos susar,” nia hatutan. 

Nia espera governu  bele  hatudu espasu ida ne’ebe apropriadu hodi bele hahu halo konstrusaun ba efisisio ne’e antes mandate governu no lejislatura ne’e remata iha tinan 2017.

Wainhira TDW koko atu klarifika asauntu ne’e ho Sekretario Estadu Terras Propriedade, funsionariu atende jurnalistas hateten katak kompetensia ba assuntu ne’e iha parlamentu nasional nia liman.

“Sekretario Estado dehan ida ne’e parlamentu nasional seidauk haruka karta ofisial ida mai kona ba espasu atu harii edifisio parlamentu nasionalfoun,” dehan funsionario ne’ebe atende jornalista hafoin informa ba Sekretario Estado.