- Publika iha: 08 Julho 2016
Tuir peskiza Sekretariado Estado Politika Formasaun Profesional e Empregu (SEPFOPE) iha 2013 kona ba forsa trabalho iha Timor –Leste, deskobre katak numeru dezempergu iha rai laran atinji 11%, maioria graduadu.
Diretor Jeral SEPFOPE, Jacinto Barros Gusmão, hateten numeru dezempregu kada tinan aumenta tanba kampu servisu iha Timor –Leste limitadu.
“Los duni dezempregu kada tinan sa’e, tanba ita haree katak industria ne’ebe Timor iha sei menus, ita foin iha industria Heineken no Timor Cement,” DJ Gusmão hateten, iha servisu fatin Kaikoli, Dili.
Nia rekonese, setor privadu barak mak eziste maibe seidauk bele emprega trabalhador ho numeru ne’ebe bo’ot, tanba problema finanseira.
Nia dehan, esforsu ne’ebe governu halo mak buka vaga servisu iha nasaun vizino sira hanesan agora dadaun Timor oan rihun mak servisu iha Korea do Soul no Australia.
“Ita koalia ona emprezario sira iha Malaysia, Cina, Macau, Japaun, Nova Zelandia no buka hela dalan atu hasai Timor oan ba servisu iha ne’eba, tanba vaga servisu iha Timor limitadu,” nia hateten.
Nia hatutan, dezempregu hanesan problem sosial ida ne’ebe bele hamosu instabilidade iha rai laran, bainhira entidades hotu la fo atensaun atu rezolve.
Atu elimina numeru ida ne’e, nia dehan governu no setor privadu sira tenke investe iha setor agrikultura, turismu no peskas, tanba area tolu ne’e mak bele fo servisu ba ema no numeru bo’ot.
Iha parte seluk Membru Parlamentu Eladio Faculto, hateten numeru dezempregu iha Timor-Leste persentajen bo’ot liu (11% ), tanba realidade maioria empregu ne’ebe iha temporario deit, la premanente.
“Temporario, depende ba projetu deit,projetu remata, sira fila ba dezempregu e laiha empregu ne’ebe sustentavel,”nia hateten.
Tanba ne’e, nia sujere ba governu atu investe maka’as iha setor agrikultura no turismu, tanba setor rua ne’e mak bele emprega ema ho numeru bo’ot.