MSS Sosa Tan Kareta Funerario 10

Tinan 2016 ne’e, Ministerio Solidaridade Sosial (MSS) sosa tan kareta funerario 10 hodi fo asistensia ba familia ne’ebe presiza.

Diretor Nasional Asistensia Sosial MSS, Mateus da Silva hateten kareta 10 ne’e, neen distribui ona ba munisipios Viqueque, Baucau, Lautem, Manatuto no Covalima, supporta sira nia asistensia tanba kareta balun kondisaun at ona no restu sei destaka iha nasional. 

Nia dehan, problema bo’ot ne’ebe durante ne’e sira hasoru mak menus transporte (kareta funerario) no numeru mate kada loron barak, difisil tebes atu responde tuir familia sira nia hakarak. 

“Iha tempu balun familia sira mai husu ajuda, maibe kareta laiha fatin (tula mate ba hotu munisipio), entaun ami lahatene atu halo saida, ida ne’e mak realidade,” nia hateten iha Hotel Timor, Dili.  

Nia espera, ho kareta foun 10 ne’e bele responde ona ba iha preokupasaun no lamentasoens husi komunidade durante ne’e. 

“Espera ita bele redus ona lamentoens husi familia matebian sira no iha nasional mos bele iha kareta sufsiente hodi koloka espesifiku ba asuntu emergensia ruma hanesan atende veteranus sira,” nia dehan. 

Durante ne’em, nia dehan kareta funerario 28 mak fo hela asistensia iha teritorio tomak kada munisipio iha kareta ida –ida, maibe iha munisipio balun kareta la funsiona ona no kondisaun ladiak. 

Iha oportunidade ne’e, nia mos husu ba familia matebian sira atu labele obriga motorista sira la’o kalan, liu –liu tula mate isin ba munisipios tanba lei la fo autorizasaun atu tula mate iha tempu kalan. 

Nia dehan, orsamentu sosa kareta ne’e mai husi Orsamentu Jeral do Estado 2015.

Iha parte seluk membru Komisaun F (saude, edukasaun, kultura, veteranus e igualidade jeneru), Deputadu Eladio Faculto, hateten nesesario duni governu sosa tan kareta funerario, tanba durante ne’e menus transporte dificulta tebes servisu liu –liu halo transportasaun ba mate isin no restu mortais sira. 

“Preve osan ba sosa kareta tenke halo mos manutensaun rutina, nune’e bele dura,” nia hateten. 

Nia hatutan, esperiensia ne’ebe iha, hatudu governu tau osan sosa kareta bar-barak maibe la to’o tinan rua-tolu hanesan ne’e kareta aat ona tanba laiha manutensaun.

Nia espera, ho aumentu kareta ne’e bele responde ona ba ejizensia komunidade nian liu-liu halo transportasaun ba mate isin sira ba fatin deskansa ikus.