- Publika iha: 31 Agosto 2016
Hafoin partisipa iha jogu olimpiku (olympic games) iha Rio, Brazil durante fulan ida, iha Domingo 28 Agostu 2016, atletas Timoroan nain tolu (Francelina Marques, Agusto Ramos ho Nelia Martins) fila hikas mai rai laran.
Atletas nain tolu ne’e to’o iha Aero Portu Internasional Nicolau Lobato, Comoro-Dili iha tuku 12 ho balun no simu direita husi kolegas, simpatizantes no reprezentante husi komisaun olimpiku no federasaun siklismu iha Timor-Leste.
Atleta Agostu Ramos, orgulho tebes hodi reprezenta nasaun no povu Timor-Leste ba partisipa iha jogu olimpiku tinan ida ne’e (2016), tanba Timor nasaun ki’ik ne’ebe hetan oportunidade partisipa iha eventu mundial ne’e.
“Buat ne’ebe ami manan esperiensia e ida ne’e mak ami hetan durante iha jogu olimpiku,” nia hateten, iha Aero Portu, Dili.
“Ami hasoru atleta famozu internasional sira no hau fiar ho esperiensia ne’ebe hau hetan, hau sei hadia diak liu tan hau nia talentu.”.
Nia dehan, distansia ne’ebe nia kompete durante iha jogu olimpiku iha Rio mak halai maratona ho distansia metru 1500, no husi ne’e nia konsege hadia rekor (durasaun halai) husi 4 : 16 (antes) ba 4 : 11.
Entretantu siklista feminina primeiru ne’ebe partisipa iha jogu olimpiku, Francelina Marques Cabral (Anche) hateten distansia mountain bike ho kilometru 30 ne’e normal iha nasaun hotu, maibe rute ne’ebe sira uja liu iha jogu olimpiku iha Rio ne’e tekniku liu kompara ho rute jogus ne’ebe nia tuir ona iha nasaun seluk iha Asia.
Hanesan rute cross country iha jogu olimpiku ne’e difisil tebes tanba iha fatuk, rai naruk no buat barak ne’ebe la fasil atu liu, maibe nia dehan ida ne’e hanesan esperiensia diak ba atleta Timoroan sira.
“Iha fatin balun hau haree hakfodak no hau sente hau labele kontinua, tanba difisil tebes, maibe hau hateten ba hau aan katak hau bele, e ikus mai hau konsege liu no hau sente ne’e vitoria bo’ot mai hau no orgulho lori bandeira Timor iha eventu ne’e,” nia orgulhu.
“Hau orgulho tebes hetan oportunidade especial ida ne’e no hau sei la haluhan iha hau nia moris tomak.”
Nia dehan, husi Asia nasaun rua Timor –Leste no Cina mak partisipa iha jogu cross country nian hodi kompete ho nasaun 20 seluk iha mundu.
“Importante iha Asia ita tenke kria jogu ho rute ne’ebe perigozu iha futuru, nune’e ba iha ne’eba (olimpiku) ita toman ona, se la’e ita hakfodak tanba difisil la halimar,” nia sujere.
Maske la hetan medalia ruma iha jogu ne’e, maibe nia konsege tama iha pozisaun 28 husi atleta nain 30 ne’ebe partisipa iha jogu ne’e tanba difisil tebes.
Alende ne’e, nia mos agradese ba familias, kolegas, individu no grupos ne’ebe supporta ona nia direita ga indireita hodi partisipa iha eventu ne’e.
Iha parte seluk, Prezidente Federasaun Siklismu, Angelo Henriques hateten atinjimentu ne’ebe siklista Anche hatudu iha jogu olimpiku ne’e, hanesan pasu ne’ebe diak tebes ba iha federasaun no futuru siklismu iha Timor-Leste.
“Hau hanoin ida ne’e pasu diak tebes ba federasaun siklismu liu –liu nasaun Timor-Leste, tanba primeira vez ita nia siklista ida bele partisipa iha olympic games,” nia hateten.
Nia rekonese, katak lafasil ba atleta ida atu partisipa iha jogu olimpiku, maibe nia orgulho ho performance ne’ebe siklista Anche hatudu iha mundial katak Timor iha siklista ne’ebe diak.
Ba futuru, nia dehan federasaun siklismu sei fo atensaun diak liu tan intermus formasaun ba iha siklista junior, prepara sira ba iha eventu internasional sira.