- Publika iha: 06 Setembro 2016
Governu liu husi Diresaun Nasional Terras Propriedade (DNTP) iha tempu badak sei hasai komunidades ne’ebe hela iha area tasi tolu, tanba fatin refere sei halo jardin nasional.
Diretor Nasional Terras Propriedades e Servisu Cadastrais, Romao Guterres, dehan governu sei halo jardin nasional iha tasi tolu.
“Entaun fatin ne’e tenke hamamuk, sei sira lakohi sai, estadu sei obriga sira atu sai,” Diretor Guterres hateten, iha Dili.
Maibe antes hasai obrigatoriumente, nia dehan tenke halo uluk halo uluk sosializasaun, fo notifikasaun 30 dias, prepara relatoriu informasaun, hafoin ne’e halo proposta orden disiplina administrative.
“Sosializasaun ami halo ona, ami hasai notifikasaun 30 dias mak sira la kumpri, ami sei prepara relatoriu informasaun, ida ne’e mos sira lakoi sai nafatin, ami halo proposta orden disiplina administrative,ne’e ba ho polisa hodi hasai forsadamente,” nia hateten.
Kona ba kompensasaun, nia dehan governu sei la fo kompensasaun ba sira, tanba laiha baze legal (lei kompensasaun seidauk iha), maibe fo ajudus humanitaria deit.
Enkuantu kona ba bainhira mak atu hasai komunidades, nia dehan depende ba estadu, karik iha tinan ida ne’e (2016) ou iha tinan oin (2017).
Tanba ne’e, nia dehan, agora dadaun prosesu avaliasaun la’o hela ba komunidades ne’ebe hela iha area tasi tolu.
Iha parte seluk Membru Parlamentu Antonio Ximenes Serpa, husu ba komunidade atu kolabora ho estadu hodi halo dezenvolvementu iha rai laran.
“Komunidade tenke sai no kolabora ho estadu,” nia dehan.