- Publika iha: 09 Novembro 2016
Membrus Parlamentu (MP) Nasional liu husi plenaria aprova $17 miloens resin ba orsamentu privativu Parlamentu Nasional (PN) nian ba iha tinan 2017 nian.
MP Arao Noe hateten, orsamentu hirak ne’e sei aloka ba programa prioridades hanesan finaliza legislasaun sira ne’ebe durante ne’e pendente, sei halo reforma iha PN (estatutu deputadu sira inklui lei ordenasaun funsionamentu administrasaun parlamentar (LOFAP) ne’ebe trasa ona ba tinan oin mai (2017).
“Iha frakeza balun mak presiza hadia no harmoniza, ne’e mak atividades prioridades ne’ebe mak ami sei halo iha tinan oin,” nia hateten.
Enkuantu orsamentu privativu PN nian iha tinan 2016 hamutuk $15 miloens resin e husi ida ne’e ezekuta ona 74%.
Nia hateten, orsamentu 2016 nian ne’e ezekuta barak liu ba atividades komisaun nian (fiskalizasaun), selu asesor inklui funsionariu sira.
Entretantu MP Albina Marcal, espera katak ho orsamentu 2017 nian ne’e bele aloka ba programas prioridade balun ne’ebe la konsege atinji iha tinan ne’e (2016).
Tanba lolos, nia hateten iha tinan 2016 ne’e konstrui ona edifisiu foun Parlamentu Nasional nian, hadia cobby house inklui kuzinha, maibe agora la konsege ona.
“Parlamentu nasional hanesan orgaun soberanu ida, tenke hetan fatin ne’ebe dignu,” nia hateten.
Alende ne’e, nia mos sujere ho orsamentu tinan oin presiza aloka espesifiku ba grupu amizade parlamentar, tanba grupu ne’e importante tebes atu hametin liu tan relasaun ho nasaun seluk.
Alende ne’e, presiza mos kria fatin espesifiku ba kondutor sira, tanba durante ne’e laiha fatin ba sira.