MP Lamentavel Ho Atitude Ajente Saude Balun

Membru Parlamentu (MP) Osorio Florindo lamentavel ho atitude ajente saude balun iha Sentru Saude Bazartete, munisipiu Liquisa ne’ebe la fo atendementu diak no ameasa fali pasiente sira.

Nia hateten, ajente saude ne’e lor-loron tama servisu tuku 11 no fo atendementu oras ida deit fila ona uma, pasiente sira tenke hein loron seluk fali atu hetan tratamentu. 

“Funsionario ne’ebe halo atitude hanesan ne’e hau hanoin iha regime atu regula sira,” nia lamenta. 

Nia afirma, sira abandona (la fo tratamentu) pasiente tanba sira preokupa ho asuntu individu balun iha uma. 

Ho kazu ida ne’e, nia husu Ministerio Saude atu fo atensaun no kontrolu diak liu tan ba iha ajente saude sira, liu –liu iha area rural. “Tanba estado selu sira hodi servi povu,” nia dehan. 

Nia hateten, ne’e kazu ida husi funsionario lubuk ida ne’ebe ho atitude hanesan ne’e, tanba durante ne’e keixa barak los kona ba atendementu saude ne’ebe ladiak. 

Hatan ba kestaun ne’e, Diretora Jeral Prestasaun Servisu Ministerio Saude, dotora Odete Viegas husu membru parlamentu sira atu hato’o keixa eskrita, nune’e inspektor sira bele halo investigasaun. 

“Normalmente atu hola asaun ruma, ami tenke iha keixa eskrita, tenke iha prova hodi ita bele foti prosesu, ami labele foti asaun see ami rona deit,” nia hateten. 

Nia mos rekonese, katak hanesan humanu, problema hirak ne’e sempre akontese, maibe ministerio presiza prova forte atu halo estudu klean ba problema. 

Nia hateten, bainhira investigasaun hatudu, provas katak ajente saude ne’e sala, maka sei iha sansaun tuir lei funsaun publika, tanba sira hanesan mos funsionario publiku Ministerio Saude nian.