Konstrusaun Kampu Futebol Gleno Paradu

Tinan ida ona konstrusaun kampu futebol Gleno, munisipio Ermera paradu, tanba kompania laiha kbi’it finanseiru atu kontinua projetu ne’e.

Membru Parlamentu (MP), Antonio dos Santos bolu atensaun governu atu toma medidas ba iha kompania ne’ebe abandona projetu ne’e, tanba laiha responsabilidade.

Situasuan ida ne’e, nia dehan impede joven sira nia aktividade desportu tanba laiha fatin seluk ba sira atu treinu.

“Impede talentu joventude sira nian atu la’o ba oin, fatin seluk laiha, so kampu ne’e deit,” nia kestiona iha plenaria, foin lalais ne’e. 

Kampu ne’e alende uza ba aktividade desportivu, uza mos  ba aktividade governu nian liu –liu selebrasaun nasional sira.

Enkuantu konstrusaun kampu futebol iha munisipio Mantuto no Maliana, nia dehan remata ona e iha Ermera abandonadu.

Entretantu Ministru Planeamentu no Investimentu do Estrategiku, Kay Rala Xanana Gusmão rekonese kestaun ne’e, tanba kompania ne’ebe kaer obra ne’e iha difikuldade kona ba finanseiru.

“Ita nia kompania sira mos laiha kapasidade finanseira, bainhira sira atu tama tender, sira tenke ba husu iha banku sira ita nian no banku husu funan ne’ebe bo’ot tebes,” nia hateten.

Xanana hateten, governu koalia ona ho banku sentral atu fo lisensa ba banku privadu ida mai halo investimentu iha Timor, liu –liu fo kreditu ba iha kompania sira ho funan ne’ebe ki’ik. 

Iha planu estrategiku nasional 2030 nian hateten ona, katak harii Banku National Dezenvolvimentu maibe seidauk iha kbi’it atu jere intermus rekursu humanus, tanba realidade Banku Nasional Comersio Timor –Leste (BNCTL) rasik mos seidauk iha kapasidade atu jere osan ho diak. 

Nia informa, tinan oin (2017) governu sei tau orsamentu ho montante $4 miloens ba iha banku sentral, ho objetivu ajuda fo kreditu ba emprezario no industria ki’ik sira hodi dezenvolve sira nia industria. 

Iha parte seluk, Sekretario Estado Joventude e Desportu (SEJD), Leovigildo da Costa Hornai hateten sira asegura deit atu prosesu konstrusaun ne’e la’o, maibe tenderizasaun ne’e responsabilidade Comisaun Nasional Aprovizionamentu (CNA) nian.

Nia hateten, governu iha ona solusaun ba problema ne’e no iha tempu badak sei bolu kompania atu koalia kona ba asuntu ne’e.

“Ami sei buka solusaun ne’ebe diak tuir lei ba problema ida ne’e,” nia hateten. 

Enkuantu projetu ne’e rasik jere husi kompania local Maferdy ho montante orsamentu $1.1 miloens.