Presiza Aumenta Polisia ba Unidade UPF no UPM

Organizasuan non Governmental Fundasaun Mahein husu ba Komando Polisia Nasional Timor –Leste (PNTL) atu aumenta membru polisia iha Unidade Polisia Fronteira (UPF) no Unidade Polisia Maritima (UPM), tanba unidade rua ne’e importante tebes.

Vise Diretor Fundasaun Mahein  (FM),Joao Almeida hateten UPF nia servisu importante tanba halo kontrolasaun ba area fronteiras husi Naktuka to’o Suai hodi prevene sasan tama ho ilegalmente inklui ema, e nune’e mos UPM halo kontrolu iha area tasi nian husi parte sul hodi evita peskas ilegal sira.

“Unidade rua ne’e importante tebes, maibe rekursu humanus la to’o, entaun presiza koloka tan membru barak hodi hala’o servisu iha ne’eba,” nia sujere.

Nia dehan, iha FM nia observasaun durante ne’e nota katak unidade especial polisia ne’ebe fahe ba sub-unidade tolu (Bataliaun Orden Publika, Corpus Seguransa Pesoal no Komando Operasaun Especial) mak iha membru barak liu.

Enkuantu, nia dehan munisipiu no postu administrative sira mos durante ne’e menus polisia, tanba kada postu administrative balun iha suku to’o 20 no iha suku balun dala ruma laiha prezensa polisia.

Iha parte seluk Membru Komisaun B (seguransa, defeza, negosius estrangeirus), Anna Ribeiro, konkorda katak unidade rua ne’e presiza aumenta membru polisia barak inklui ekipamentus ne’ebe sufsiente hodi fasilita sira nia servisu.

“Governu tenke trasa planu hodi parlamentu bele aloka orsamentu ba ida ne’e,” nia hateten.

Hatan ba kestaun ne’e II Komandante Jeral PNTL Komisariu Faustino da Costa, rekonese katak komando mos iha hanoin atu rekruta hodi koloka membru barak iha unidade sira ne’e, maibe depende ba orsamentu.

“Ami mos ejiji hela atu oinsa bele koloka membru barak iha unidade rua ne’e maibe tenke apoia mos ho orsamentu,” nia hateten.