- Publika iha: 08 Outubro 2021
Liu husi selesaun ba filme ne'ebe mak kada tinan hala'o husi eventu Dili International Film Festival (DIFF) rezultadu hatudu katak kada tinan Timoroan barak mak hatudu habilidade diak hodi produs filme.
Diretora DIFF, Lena Lenzen, hateten husi DIFF hare katak kriador filme Timoroan sira kada tinan sempre aumeta sira nian kapasidade tanba filme 20 ne'ebe mak DIFF halo selesaun ne'e kapas tebes.
"Husi filme 20 ne'ebe ami simu ne'e, balun produs konaba Covid-19, filme komik, domin, direitos humanus, no filme motivasaun balun. Husi rezultadu filme ne'ebe ami simu hatudu katak juventude sira iha abilidade diak tebes ba konta historia liu husi filme," Lenzen hateten.
Nia hateten, filme ne'ebe Timoroan sira produs ne'e kualidade diak no interesante tebes ba ema seluk atu rona sira nia inspirasaun.
"Maske ita iha Timor-Leste la iha eskola filme nian maibe ita nia joven sira iha kapasidade no kreatividade ne'ebe natural no diak hodi produs filme badak sira," nia salienta.
Tanba ne'e nia dehan, plano iha futuru sei kria eskola filme iha Timor hodi forma Timoroan sira iha industria filme nian.
Iha fatin hanesan, Premio Nobel da Paz, Jose Ramos Horta, hateten Timoroan barak mak iha jeito ba sinema no aktor involve mos katuas ferik sira mos iha sinema, ezemplo hanesan filme Balibo 5 ne'ebe kapas no kualidade diak tebes.
Nia dehan, evento DIFF ne'e hodi fo oportunidade ba Timoroan sira gosta fotografia no cinema laos para hare deit maibe halo produsaun.
"Hau enkoraja joventude sira ne'ebe mak iha abilidade ba filme ne'e atu prepara diak liu tan tanba loron ida eventu Dili International Film Festival ne'e sei sai assuntu ne'ebe bo'ot no importante laos iha Timor deit maibe iha nivel rejiaun," Premio Nobel da Paz Horta hateten.
Nia informa tan katak, nia komunika ona ho Diretor Bollywood internasional sira atu bele kopera hodi apoiu tanba ne'e hein deit situasaun normal sira sei mai vizita Timor-Leste.
Entretanto, Produtor Filme Timoroan Orlando Magno hateten, agradese tebes ba DIFF tanba liu husi evento ida ne'e joventude sira bele hatudu talento konba produsaun filme.
"Hau uluk mos la iha konhesimento oinsa atu konta historia liu husi filme badak ida, maibe depois hau involve iha evento DIFF mak hau foin komprende oinsa atu sai kriador filme," Magno hateten.
Tanba ne'e, nia orgullu tebes ba DIFF tanba bele fo ona oportunidade ba Timorona sira atu bele kompete iha industria filme nian.