- Publika iha: 15 Outubro 2012
Atu labele kahur malu ho ema bo’ot iha prizaun laran, Governu liu husi Ministeriu Justisa (MJ) iha ona planu atu harii Sentru Detensaun Labarik (SDL), nune’e bainhira labarik minoridade (16 anos mai kraik) sira komete iha krimi, sira bele detein iha ne’eba.“Agora dadaun diresaun prizaun nian hala’o hela estudus, levantamentu no dezenu no sei harii iha tempu badak hodi hare labarik sira ne’ebe iha problema ho lei (krime) se karik desizaun tenke kastigu nia, karik uza mekanismu oinsa, la’os atu sulan hamutuk fali ho ema bo’ot maibe ho kuidadu,” dehan Vise Ministru Justisa (VMJ), Ivo Valente, iha Colmera, Dili.
VMJ Valente afirma, tuir planu sei harii SDL ne’e iha Distritu Liquisa ou Metinaro e iha aftin ne’e Madre no Padre sira sei fo bimbingan, atu sira lale sai kriminozu iha futuru.
Nia hatutan, bazeia ba artigu 20 Kodigu Penal (KP), koalia katak labarik minoridade (16 anos mai kraik) ne’ebe komete krime labele hetan kastigu tama prizaun.”Tanba sentru ne’e la’os prizaun,” tenik VMJ ne’e.
Entretantu Reprezentante povu iha Uma Fukun Parlamentu Nasional, Deputadu Eladio Faculto hateten planu ne’e diak maibe tuir regras no kriteriu ne’ebe governu iha.
“Ita tau sentru detensaun signifika katak ita atu koloka labarik sira iha fatin ida kuandu sira komete buat ruma la los, tanba ne’e ita iha fatin ida propriu atu detein sira nune’e sira bele rehabilita sira nia aan maibe la’os solusaunn ne’ebe diak, hau nia hanoin importante mak fo edukasaun ne’ebe masimu ba labarik sira,” dehan Deputadu Faculto.