- Publika iha: 06 Dezembro 2012
Labarik hirak ne’e merese duni atu hetan asesu ba edukasaun formal tanba sira mos iha direitu hodi hetan sira nia moris rasik iha futuru.
“Iha Casa Vida, ami iha sistema ida ne’ebe mak atu dezenvolve labarik sira nia moris entaun Casa Vida kria estudu ba sira hanesan prepara apoiu atu selu sira nia eskola no nesesidade estudus nian e agora dadaun iha labarik hamutuk nain 23 hetan ona edukasaun formal,” dehan Koordenadora Uma Mahon Casa Vida, Domingas Soares, iha Bidau Akadiru- Hun, Dili.
Orsamentu ne’ebe uza hodi selu sira nia eskola mak osan ne’ebe durante ne’e doadores sira (nasional no internasional), Governu no individu sira fo apoiu ba Uma Mahon CV ne’e.
“Sira nain 23 ne’e iha balun hala’o estudu iha Pre-Primaria, Pre-sekundariu no Sekundariu Publiku sira iha Dili laran, nain ida ho idade 24 mak hala’o nia estudu iha universidade Privado ida iha Dili, sira seluk iha nain 10 resin mak tuir programa alfabetizasaun,” tenik Kordenadora Uma Mahon CV ne’e.
Alende ne’e Casa Vida mos nafatin enkoraja ba labarik sira ne’ebe laiha ona vontade atu asesu ba edukasaun liu husi atividade ne’ebe Casa Vida iha ba labarik sira ne’ebe sai vitima ba violensia hotu.
“Ami nia vizaun no misaun mak sira bele hetan sira nia moris rasik, atu sira bele asesu ba edukasaun no servisu, ami espera katak bainhira sira re entrega ona ba sira nia familia no sosiedade sira labele depende ba sira nia inan aman, sosiedade no governu maibe sira bele uza konesemententu ne’ebe sira hetan durante iha ne’e,” Kordenadora ne’e esperansa.
Iha parte seluk Ministra Solidaridade Sosial (MSS), Isabel Amaral Guterres hateten politika governu nian atu fo atensaun ba familia vuneravel sira liu-liu labarik no feto sira ne’e klaru ona, hanesan fo subsidiu ba Idozus no Invalidu sira, Bolsa da Mãe ba labarik no joven sira atu asesu ba edukasaun, suporta Uma Mahon sira hanesan parseiru governu nian atu tau matan ba labarik sira ne’ebe iha uma mahon.
“Hau hanoin politika hala’o ona iha governu anterior e programa ne’ebe agora dadaun ami V governu hala’o ne’e hanesan kontinuasaun deit, konserteza nafatin apoiu defisiente no idozus invalidu sira hanesan mos ita hare programa bolsa da mãe, no supporta uma mahon sira kontinua la’o nafatin,” dehan Ministra Guterres.