- Publika iha: 29 Janeiro 2013
“Tinan ida ne’e ita prepara ba rekursu umanu atu harii sentru detensaun ba labarik tanba hanesan imi hatene ita ratifika ona konvensaun direitu labarik ita tenke kumpri norma ka lei ne’ebe konvensaun dehan,” dehan Vise Ministru Justisa, Ivo Jorge Valente, (14/01), iha Colmera, Dili.
Nia hatutan, dezenu ba sentru ne’e remata ona hein deit fatin ne’e halo klaru nune’e bainhira iha ona orsamentu bele hahu ona.
Projeitu ne’e sei kaer husi Ministeriu Estatal tanba konstrusaun ne’e tama iha projeitu Infra –struktura Dezenvolvimentu Distrital (PIDD) ho orsamentu kuaze $5 mil e tal resin.
Alende ne’e MJ mos sei servisu hamutuk ho Ministerio Solidaridade Sosial (MSS) no relijiozus sira hodi prepara rekursu ne’ebe espesifiku atu trata labarik sira ne’ebe komete krimi tanba sira iha papel importante atu eduka sira.
Entretantu Program Manager Protesaun Labarik iha Organizasaun Forum Tau Matan, Xisto Goncalves hateten ne’e planu positive ne’ebe governu halo atu responde ba situasaun labarik iha rai laran no ne’e obrigasaun estadu nian atu harii tanba estadu tenke kumpri norma ne’ebe hakerek iha Konvensaun laran no rekomendasaun ne’ebe Komite Direitus Labarik fo ba estadu Timor –Leste.
“Nudar parseiru governu nian ami apresia bainhira governu iha inisiativa atu harii sentru detensaun ba labarik, ida ne’e obrigasaun estadu nian, importante mak governu tenke iha seriedade atu tau orsamentu no politika hodi responde ba situasaun labarik no interese diak labarik nian,” dehan Program Manager ba protesaun labarik ne’e. n