- Publika iha: 19 Fevereiro 2013
Ministeriu Justisa laiha planu atu halo transforma Komisaun Nasional Direitu Labarik sai organizasaun independente ida iha future.Tuir Vise Ministru Justisa (VMJ), Ivo Jorge Valente katak bazeia ba rekomendasaun husi Membrus Konselhu Direitus Humanos iha Jenewa, tinan 2007 Governu Timor-Leste estabelese Komisaun Nasional ba Direitus Labarik (KNDL) iha Ministeriu Justisa nia okos.
“Iha posibilidade ka lae ne’e depende ba dezisaun politika sira iha future atu hare, se to’o ona faze ida preparadu ona atu hamrik mesak bele maibe la’os agora,” dehan Vise Ministru Justisa, Ivo Jorge Valente, (04/02), iha Parlamentu Nasional.
Kona ba orsamentu ne’ebe Ministeriu Justisa kada tinan aloka ba KNDL, Vise Ministru dehan depende ba planu annual no aktividade komisaun nian.
Iha parte seluk, Koordenador Protesaun Labarik iha Organizasaun Forum Tau Matan (FTM), Xisto Gonsalves hateten importante duni no tenke define klaru future KNDL tanba durante ne’e sira labele halo buat barak.
“Ita konsidera KNDL ida agora ne’e hanesan asu karik la iha nehan atu tata, nia so hatenu deit maibe ba future governu tenke define lolos tanba iha lei kodigu labarik mos iha artigu balun koalia kona ba KNDL tenke sai independente,” dehan Koordenador FTM ne’e.