- Publika iha: 24 Abril 2018
Vise Ministru da Saude (MdS), Luis Lobato hateten iha tempu badak sei muda statutu Banku Nasional Sangue (BNS) husi unidade ba instituisaun autonomia, hodi fo kbi’it ba sira hala’o servisu atendimentu transfusaun ran iha Timor –Leste.
Nia dehan, BNS merese duni sai instituisaun autonomia ida, tanba durante ne’e sira nia atendimentu fornese ran ba fasilidade saude hotu iha Timor laran tomak, liu –liu ospital referral sira, sentru internamentu iha munisipio sira.
“Hau hanoin iha tempu badak ami sei realiza ida ne’e, hein katak desizaun ida ne’e bele iha kondisaun ida ne’ebe kompletu, diak liu atu bele rekolha ran doasaun ran hodi fo atendimentu iha ospitais sira,” nia hateten bainhira partisipa iha serimonia asina MoU entre Cruz Vermeilha Timor –Leste (CVTL), Banku Nasional de Sangue (BNS) ho parsiru sira iha edifisio CVTL, Dili.
Nia dehan, desizaun ne’e governu ida ne’e bele halo tanba hasai deit despaisu ministerial nian hodi hateten BNS sai ona instituisaun autonomia ida ne’ebe submete ba Ministerio da Saude nia okos hodi fo atendimentu servisu transfusaun ran, la presiza dekretu lei.
Iha parte seluk, Xefe Departamentu Laboratorium Hospital Nasional Guido Valadares (HNGV) Frans da Silva hateten mehi ne’ebe iha mak unidade ida ne’e tenke sai sentru nasional transfusaun ran atu iha kibi’it intermus rekursu humanu no finanseiru atu halao servisu ho diak.
Nia dehan, agora dadaun sira iha rekursu ne’ebe limitado tanba ne’e sira foku liu ba servisu atendimentu transfusaun ran, maibe edukasaun hasa’e konsensia ema nian atu fo ran ladun la’o ho maximu.
“Ho statutu unidade, ami iha limitasaun ba rekursu humanu,susar tebes atu fo atendimentu to’o iha teritorio tomak,” nia hateten
Nia informa, kada fulan iha HNGV pasiente hamutuk 300 to’o 400 mak presiza ran, maibe ran ne’ebe iha BNS limitado, entaun obriga familia sira tenke fo ran hodi ajuda.