Saude Dili Registu Kazu Dengue 220, Nain Ida Mate

Iha tinan 2018 (Janeiro –Abril), Servisu Saude Munisipio Dili registu kazu dengue hamutuk ema nain 220, husi kazu ne’e nain ida mak mate.

Diretora Saude Munisipio Dili, Agustinha Seguerado hateten intervensaun hotu servisu saude halo hodi prevene komunidade, liu –liu labarik sira husi moras ida ne’e, maibe Dili nafatin registu kazu aas kompara ho munisipio seluk.
Nia dehan, tinan ne’e ema ida mak mate tanba moras dengue, ema ne’e ho sidadaun estrangeiru ho idade tinan 60.
Nia hateten, asaun intervensaun ne’ebe sira halo mak edukasaun promosaun saude ba komunidade kona ba prevensaun moras, distribui aimoruk abate ba uma kain risku sira atu oho susuk nia tolun no halo fumigasaun ba area afeitado sira hodi hakotu transmisaun.
“Ami la tur nonok deit, ami halo sensibilizasaun ba suku no aldeia sira ne’ebe afeitado, aproxima no bolu komunidade sira nia partisipasaun ba asaun kombate moras ida ne’e,” nia hateten iha servisu fatin, Dili.
Nia dehan, komunidade iha responsabilidade atu trasa planu hodi kombate moras ida ne’e iha suku laran, tanba ministerio nia papel mak fahe informasaun kona ba moras ne’e nia perigu no siklu moris vektor ne’ebe lori moras ne’e atu komunidade sira komprende.
Iha parte seluk, Xefe Sentru Saude Vera Cruz Dulce Tilman hateten kada loron ida sira fo atendimentu saude ba ema kuaze 300 to’o 400 no moras ne’ebe domina mak ba labarik moras dengue, malaria no ema adulto mak moras penomonia no Tubercolouse.
Nia dehan intervensaun ne’ebe sira halo bainhira identifika kazu dengue mak ekipa vigilansia servisu hamutuk ho Ministerio da Saude hodi halo intervensaun no prevensaun iha komunidade risku sira.
“Intervensaun ne’ebe ami halo ba komunidade afeitado moras dengue mak halo fomigasaun (rega) sira nia uma no fo edukasaun ba komunidade sira,” nia hateten
Nia hateten area Vera Cruz sai mos area afeitado ba iha moras dengue, tanba bainhira udan monu rai bee nalihun barak fo oportunidade ba susuk atu halo knu’uk no dezenvolve aan.