Saude Dili Registu Kazu Malaria Rua

Diretora Servisu Saude Munisipio Dili, Agustinha Seguerado hateten iha tinan ne’e (2018) sira registu ona kazu malaria rua, laiha mate tanba intervensaun no tratamentu diak tebes.

Nia dehan, kazu rua ne’e la’os transmite iha rai laran, maibe afeitado ne’e halo vizita ba flores (Indonesia) semana ida no fila mai kona moras.
Depois identifika kazu, nia hateten ekipa saude tun ba iha komunidade afeitado hodi hasai ran massal komunidade, rega susuk no distribui muskateiru ba familia ne’ebe laiha muskateiru atu uza hodi prevene aan.
“Iha postu administrative Atauro, ita halo hela kontrolu liu –liu ba komunidade sira ne’ebe halo negosio iha parte Liran (Indonesia) antes ba ita hasai sira nia ran, fo informasaun ba sira no fo mos muskateiru atu sira uza iha ne’eba, depois sira fila ita hasai fali sira nia ran hodi koko,” nia hateten iha servisu fatin Dili.
Nia dehan, la’os deit Atauro maibe sira mos tau ekipa iha pontu entrada sira hanesan Aero Portu no Portu Dili hodi kontrola movimentu pasajeirus nian, tanba realidade hatudu kazu barak mai husi nasaun seluk.
Iha parte seluk, Xefe Sentru Saude Vera Cruz Dulce Tilman hateten intervensaun ne’ebe sira halo ba kazu malaria mak fo tratamentu ba pasiente no halo prevensaun ba komunidade risku sira liu husi halo fulberizasaun.
Nia dehan, kazu malaria ne’ebe identifika la’os transmite iha rai laran maibe mai husi nasaun seluk tanba afeitado sira halo viajen ba iha nasaun vizino.
“Ita la presiza izolamentu, depois detekta loron primeiru baixa no ami nia pesoal ba follow up iha uma,” nia hateten.
Tanba ne’e, nia apela ba iha komunidade ne’ebe halo viajen ba iha nasaun seluk, fila mai sente moras tenke lalais ba fasilidade saude hodi halo ezaminasaun ran atu evita transmisaun ba ema seluk.