Familias 206123 Hetan Ona Vizita Husi Profesional Saude

Durante tinan tolu (2015-2018) implementa programa Saude na Familia (SnF), professional saude sira konsege vizita ona familia hamutuk 206123 iha teritorio tomak.

Diretora Jeral Prestasaun Servisu, dotora Odete Viegas hateten objetivu principal husi programa SnF mak hakbesik saude ba komunidade sira, liu –liu ba individu sira iha familia laran.
Nia dehan, husi vizita ne’e profesional saude sira konsege vizita ona uma kain hamutuk 173786 no familia hamutuk 206123. Husi familia ne’e iha membru familia hamutuk 1029242 mak hetan ona asistensia saude husi profesional saude sira.
Nia hateten, iha vizita sira sei halo klasifikasaun ba grupo hat iha familia laran, grupos hanesan grupo primeiru ema saudavel, segundu ema risku ba moras, terseiru ema moras no kuatru defisiensia.
“Moras ne’ebe ita hetan iha komunidade mak moras hipertensaun ho persentajen ne’ebe aas, moras Asma, diabetes no Tubercolouse,” nia hateten iha bainhira halo aprezentasaun ba rezultado vizita saude familia durante tinan tolu iha klinika Paz Becora, Dili
Nia dehan, bainhira identifika moras sira ne’e profesional saude sira halo intervensaun liu –liu hasai ran no kaben tasak hodi halo diagnostiku ba tratamentu nian.
Nia informa, husi dadus ne’ebe profesional saude sira rekolha, 88% mak hatama ona iha sistema registu saude elektronika hodi fasilita profesional saude sira iha fasilidade saude halo konsulta, bainhira presiza asistensia saude.
Iha parte seluk, Xefe Suku Lahane Oriental Trindade do Amaral Pinto hateten programa ne’e diak tebes no sira pronto atu supporta politika estado nian atu lori to’o ba povu sira iha area rural.
“Obrigasaun ba autoridade local sira atu supporta politika estado nian ba saude diak povu Timor –Leste, tanba povu saude diak mak dezenvolvimentu mos la’o diak no nasaun sei forte,” nia hateten.
Entretantu, inisiador programa SnF Maria Reis hateten kongratula Ministerio da Saude ho nia ekipa tomak ne’ebe halao ona servisu ida ne’e tanba la fasil atu visita familia sira iha teritorio tomak.
Nia dehan, tinan 1999 iha Klinika Paz sira hahu servisu ida ne’e iha suku Becora tanba iha problema barak liu –liu mortalidade labarik no inan sira nian as, violensia aas, maibe ho esforsu sira nian fo edukasaun ba familia konsege redus problema sira ne’e.
“Hau espera kuandu iha motivador ida ne’ebe diak sira (profesional saude) ne’ebe servisu ne’e ho laran kaman atu halao servisu ne’e,” nia espera.
Nia apresia, ho rezultado ne’ebe iha, maibe nia husu atu profesional saude sira kontinua visita no koalia beibeik ho familia sira atu muda sira nia stilu moris no fo importansia ba iha saude.