- Publika iha: 11 Julho 2011
Diretor Jeral Miniteriu Saude (MS) Agapito da Silva hateten moras mental sai problema social iha komunidade nia le’et, maske ministeriu buka atu resolve problema ne’e maibe difisil tanba ne’e presiza kontribuisaun husi familia sira atu fo asistensia ba sira.
“Moras mental ne’e la’os moras ba-bain, e la fasil atu kura, presiza la’o neneik atu resolve, maibe importante liu mak komunidade liu-liu familia tenke ajuda fo asistensia nune’e it a bele kura moras ne’e maske kleur, tanba ami mesak labele halo buat ida,”hateten Diretor Jeral MS Agapito da Silva, semana kotuk iha Kaikoli,Dili.
Relasiona ho ema moras mental ne’ebe aumenta ba bebeik, nia parte iha ona planu atu estabelese fatin ida ba sira iha Ospital Naisonal Guido Valadares (HNGV), nune’e sira mos iha fatin ketak ida.
“Ita foin iha fatin ida ba ema moras mental iha sub-distritu Laclubar, distritu Manatuto hodi tau ema moras mental sira, maibe fatin ne’eba la sufsiente entaun ita presiza kria tan fatin ida nune’e bele fo atensaun ba maluk sira ne’ebe moras mental,” Agapito dehan.
Tuir nia, moras mental lahanesan ho moras sira seluk hanesan malaria ne’ebe bainhira fo aimoruk,moras ne’e diak kedas, maibe moras mental presiza atensaun especial husi familia rasik, nune’e sir abele diak lalais. “Se familia mos husik hela, entaun difisil atu diak,”.
Iha parte seluk, Deonizio da Silva, komunidade Mascarenhas hateten moras mental difisilatu kura tanba moras ne’e lahanesan ho moras seluk, presiza hetan tratamentu husi fasilidade saude liu-liu presiza atensaun maximu husi familia.
“Maibe hau apresia teb-tebes ba sistema Ministeriu Saude,maske moras ne’e difisil atu kura maibe sira iha duni esforsu halo oinsa para bele kura ba moras nee,hanesan fo aimoruk atu hemu,liu-liu mos kuandu ita iha familia laran mos bele fo aistensia ba sira,kuandu ita familia mak lakoi tau matan ba sira entaun sira bele la’o hela iha dalan ka toba iha ne’ebe mos ita la hatene,”nia hateten.