- Publika iha: 13 Abril 2012
Primeiru Ministru ka atual Ministru Defeza no Seguransa, Xanana Gusmao husu ba Polisia Nasional Timor-leste (PNTL) atu hatudu profesionalismu servisu, nune’e bele manan konfiansa povu nian.“Ohin ita halo tinan sanulu resin rua, ezekuta ita nia knar tenke la’o tuir lei no orden, ikus-ikus ne’e ita halo rejustamentu, reforma hodi ita hotu no povu tomak bele fiar seguransa, seguransa ba sira nia aan no sira nia riku soin, seguransa iha duni sira nia oan matenek nia liman no professional,” hateten PM. Gusmao iha aniversariu loron PNTL nian (27/03) iha Distritu Oe-Cusse.
Atual Ministru Defeza no Seguransa Gusmao, relembra katak iha tinan hirak liu ba mosu krizi bo’ot, maibe konsege rekopera situasaun hodi povu hotu moris hakmatek.
“Tinan hirak liu ba ita baku malu, oho malu, estraga malu tinan lima liu tiha ona ita ajuda kria ambiente diak tebes iha ita nia rai ida ne’e ho imi hotu nia serbisu no esforsu,” dehan PM. Gusmão.
PM. Xanana mos husi ba Komandante sira atu nafaitn kaer metin lei no orden li-liu iha tinan ne’e, tanba sei hasoru eleisaun dala rau tan maibe waihira iha pesoal ruma atu estraga estbilidade tenke hanorin nia, “naran katak ketak oho tanba ita nia nasaun no povu nia interese bo’ot liu, ema ida ka rua nia hakarak hodi hamosu instabilidade,” PM. Xanana katak.
Entertantu Komandante Polisia Distrito Oé-Cusse, Superintendente Mateus Acencão Mendes hateten, tinan ne’e selebrasaun loron aniversario PNTL la’o ho simples tanba komemorasaun konsentra iha nasional.
‘’Ami la iha atividade proprio ba komemorasaun loron ohin tanba iha loron ohin senhor Primeiro Ministru atu hala’o servisu iha Oé-Cusse ne’ebé ami sei intende ami nia an hotu ba aktividade Primeiro Ministru nian no komemorasaun hala’o hotu iha Dili,” Komandante Mendes hateten.
Sorin seluk Jovenetudi, Hilario Da Costa Babo, louva ho servisu PNTL tamba durante ezekuta sira nia knar ho professional sen halis ba ema seluk.
“Parabens ba Ita nia polisia sira ne’ebé maka ohin kompleta tinan sanulu resin rua, PNTL tenke lao hakat ba oin nafatin, lao tuir esperesia ne’ebe maka durante ne’e sai hanesan lisaun ba ajente ida ida-idak,” Joventude Babo fo parabens.