- Publika iha: 13 Abril 2012
Atu manan konfiansa husi komunidade, Polisia Nasional Timor-Leste (PNTL) presiza hatudu disiplina no profesionalismu servisu iha servisu fatin ka iha terenu.“Tanba ho disiplina diak no servisu ho profesionalismu mak nudar xavi importante hodi manan konfiansa povu iha rai doben ida ne’e,” hateten Komandante Polisia Distritu Baucau, Superintendente Xefe Faustino da Costa, semana kotuk (27/03) iha komemorasaun loron PNTL nian ba da-12 iha Distritu Baucau.
Komandante da Costa dehan, mensajen husi Komando Jeral PNTL nian ne’e, Komando Distrito sei halo kopia atu fo ba Komandante Esquadra Sub-distritu sira hotu iha Baucau laran, atu nune’e membru sira ne’ebe la mai partisipa iha serimonia ida ne’e, atu sira mos bele asesu informasaun hirak ne’e.
Iha oportunidade hanesan Administrador Distritu Baucau, Antonio A. Guterres hateten instituisaun estado nian tenki iha komitmentu no responsablidade ba nia instituisaun rasik, oinsa mak loke liman atu servisu ho komunidade sira.
“Hau hakarak husu ba instituisaun polisia nasional timor-leste distrito Baucau servisu no servi ba komunidade ho profesionalismo no ho komitmentu,” Administrador Guterres sujere.
Tuir Administrador Gute¬rres, komprimisiu, disiplina,no profesionalismu mak hanesan fator determinante ida ba dedikasaun servisu.
Hola parte iha komemorasaun aniversariu loron PNTL nian ba da-12 ne’e, mak Administrador Distrito Baucau, Xefe Departamento nebe destaka iha Baucau, Reprezentante F-FDTL Baucau, UNPOL, Sociadade Sivil no Komandante PNTL Distritu Baucau ho nia membro tomak inklui komunidade balun.