- Publika iha: 02 Maio 2012
Vitima mutilasi MV rasik sai husi uma iha dia 15 Abril 2012, tuku 08:00 kalan no hetan fali ho kondisaun mate tanba ema oho.
“Kona ba motivu vitima MV ne’e husi polisia SIC seidauk hatene, nia mate ne’e razaun saida, tanba ita rekolha mate isin ne’e nia oin laiha no nia orgaun isin balun laiha, antaun prontu prosesu investigasaun ne’e sei la’o hela no sei kontinua hela para ita bele hatene motive husi ema oho ne’e saida,” dehan Xefe Operasional Servisu Investigasaun Criminal Nasional (SIC) Adjuntu Angelo Quelo, semana kotuk, (23/04) iha Kaikoli, Dili.
Tuir Adjuntu Quelo, mate isin vitima MV hetan iha area Akanunu-Hera, iha tempu kalan hafoin rona informasaun, polisia foti medidas hodi ba iha fatin ne’e.
“Ita so simu informasaun wainhira kuandu dehan katak sira hetan mate isin iha Hera, iha foho leten ne’e Akanunuk, hau rasik indika hau nia membrus sira para desloka ba fatin refere hodi sira hare mate isin ne’e,” esplika Adjuntu Quelo.
Entertantu Membru Komisaun B Parlamentar, Deputadu Paulo Fatima Martins, husu polisia atu halo investigasaun lalais ba kazu ne’e.
” Ne’e kompetensia polisia nian atu halo investigasaun lalais, no buka autor ne’e, no hetan ona autor ne’e tenke prosesu tuir lei lori arguido ne’e ba tribunal,” sujere Deputadu Martins.
Nia mos husu, hare ba kondisaun ne’e polisia tenke aumenta tan volume patroliamentu atu bele garante seguransa iha rai laran.