Sosa roo ba forsa naval lahatudu rezultadu signifikadu

Publika iha: 10 Maio 2012

Prezidente da Republica Jose Ramos Horta apela ba governu foun atu kontrola peska ilegal iha tasi Timor. Maske governu sosa ona roo ba Forsa Naval atu kontrola tasi Timor nian, maibe peska illegal kontinua halo atividade peska iha tasi Timor nian, tanba ne’e Xefe Estadu Jose Ramos Horta husu, atu tau matan ba area maritime iha teritoriu tomak.
“Hau la kompriende tanba ita sosa tiha roo sira, depois la halo atividade ruma ne’ebe iha signifikadu,” hateten preokupa Prezidente Horta, semana kotuk (23/04) Distritu Baucau.

Prezidente Horta dehan, populasaun sira durante tinan barak nia laran halo keixa bara-barak kona ba peska illegal iha tasi Timor, maibe governu seidauk iha desizaun ne’ebe klaru.

“Hau ho Xefe Estadu Maior Jeneral ho Komandante Jeral PNTL, ami hare tiha oinsa mak atu tau dadaun ona pelotaun PNTL no F-FDTL nian ida iha ne’eba, mesmu laiha infra-estrutura hanesan Quartel ka baze ruma,” dehan Xefe Estadu Horta.

Iha parte seluk Komunidade Sanzinha dos Santos, sente triste no husu ba PNTL no F-FDTL atu matan ba area maritime iha teritoriu tomak.
“Hau sente triste tanba peskador illegal sira, barak tama mai no kaer hotu ita nia ikan sira no riku soin sira ne’ebe iha tasi laran,” Komunidade dos Santos preokupa.
Tuir nia, governu sosa roo ba forsa naval para atu halo patrulia ba Timor nia riku soin ne’ebe iha tasi laran.