- Publika iha: 15 Maio 2012
Tuir Segundu Komandante Polisia Nasional Timor-Leste (PNTL), Komisariu Afonso de Jesus, roo sia Policia Maritima (PM) nian ne’e aat tanba sala utiliza husi PM sira, tanba roo ne’e lolos uza ba bee deit e sira uza ba tasi entaun afeta ba makina roo hirak ne’e.
“Hau la iha espertu para atu hare kona ba roo ne’e, maibe saida maka hau hatene husi ema balun, ema sira nebe maka servisu iha ne’eba katak roo ne’e utiliza ba iha bee ninian, la’os ba iha tasi nian.
Komu ita hanesan ema foun laiha esperensia ita dehan katak roo sira ne’e roo tasi ninian ne’ebe agora roo sira ne’e la funsiona ho diak,” Komisariu de Jesus dehan semana kotuk (07/05), iha Kaikoli, Dili.
Roo sia ne’ebe mak governu oferese ba Polisia Maritima (PM), oras ne’e dadaun paradu husi atividade tanba ho kondisaun aat, maibe problema ne’e la afeta ba servisu Polisia Maritima, atu kontrola iha tasi laran.
“Servisu Polisia Maritima la’o nafatin atu kontrola tasi laran,” dehan Segundu Komandante Komisariu de Jesus.
Entertantu Membru Komisaun B Parlamentar, Deputadu Jose Teixeira, husu atu hatene tuir motivu tanba saida mak roo sia ne’e aat.
“Tenke investiga ho di-diak tanba orsamentu ne’e gasta, gasta oinsa tanba iha parte seluk servisu PM la halo nia knar ho diak ona tanba roo sira ne’e la la’o,” deputadu Teixeira sujere.
Ho kondisaun roo sia ne’ebe aat hotu, Deputadu ne’e mos sujere, atu oferese tan roo ba Polisia Maritima, nune’e sira bele halo kontrola ba peska illegal sira iha tasi Timor nian.