- Publika iha: 21 Maio 2012
Atu garante seguransa ba iha vendedores sira ne’ebe fa’an sasan iha merkadu Manleu, presiza monta postu seguransa ida iha fatin ne’eba.“Tenke iha postu fiksu ida tau iha ne’eba, psikologikamente fo imajen seguru ba iha merkadu ne’e no Manleu en jeral, tanba iha merkadu ne’e normalmente sempre mosu konflitu, ne’ebe presiza polisia besik hodi nune’e fasil atua lalais,” sujere Deputadu Joaquin Amaral, semana kotuk (11/05), iha Uma Fukun, Dili.
Nia hato’o kestaun ne’e tanba vendedores sira nia sasan tau hotu iha merkadu, e sira tenke fila ba uma iha tempu kalan no polisia tenke garante seguransa iha fatin ne’eba.
Entertantu Segundu Komandante Jeral Polisia Nasional Timor-Leste (PNTL), Komisariu Afonso de Jesus, polisia prontu fo seguransa iha area ne’ebe hodi nune’e vendedores sira senti seguru wainhira hala’o sira nia atividade negosiu.
“Postu polisia iha Manleuana ne’e iha hira kedas, postu ida iha delta 4, postu ida iha Manleuana, e postu sira ne’e maka sei halo seguransa iha fatin ne’eba ne’e duni hau hanoin ne’e bele responde ba kualker situasaun ne’ebe maka mosu,” hateten Komisariu Afonso de Jesus.
Tuir nia, sei koloka membru polisia para bele halo monitoring iha area refere, para bele responde ba nesesidade komunidade ne’ebe maka ba halo’o sira nia vida ekonomia iha fatin ne’eba.