- Publika iha: 25 Junho 2012
Hafoin halo peskiza ba kondisaun Unidade Polisia Fronteira (UPF) iha Batugade, Fundasaun Mahein (FM) identifika katak UPF Batugade laiha kondisaun hela fatin ne’ebe diak hodi suporta sira nia servisu.“Laiha uma ne’ebe maka ho kandisaun diak atu sira bele halo’o sira nia servisu ho diak, fatin ne’e importante atu sira bele tuir no toba, atu bele halo seguransa iha fatin ne’e” dehan Diretor FM Nelson Belo, (04/06), iha Balide, Dili.
Tanba ne’e nia parte husu ba Sekretariu Estadu Seguransa (SES), atu tau atensaun ba kestaun ne’e, tanba sira mak nudar lutu ba nasaun nian.
Alende hela fatin, Polisia fronteira sira mos laiha radio komunikasaun, laiha transporte ne’ebe bele fasilita sira atu hala’o sira nia servisu ho diak.
“Kareta ne’e fasilidade ne’ebe maka sira presiza liu, tanba sira tenke ba mai fatin barak hanesan Batugede ba Tunubibi no Memo, ne’e presiza kareta la’os la’o ain fali,” hateten Diretor Belo.
Entertantu Segundu Komandante Jeral PNTL Afonso de Jesus, rekonese katak durante ne’e kondisaun infrastrutura ba polisia fronteira seidauk bele resolve.
“Los duni katak iha Unidade Polisia Fronteira laiha postu ne’ebe maka diak, problema radio komunikasaun, transporte no seluk tan, e hau hanoin ba future sei iha mundansa ba kestaun sira hanesan ne’e,” Komisariu de Jesus katak.
Tuir nia, kestaun ne’e dalabarak ona Komando halo diskusaun ho SES maibe to’o agora laiha responde.