- Publika iha: 02 Julho 2012
Prosesu kee mate ruin ba vitima 12 Novembru 1991, oras ne’e dadauk kontinua la’o hodi identifika fatin ne’ebe diskunfia military Indonezia sira hakoi mate isin sira ne’ebe sira oho.“Prosesu la’o nafatin , fatin ne’ebe mak ami identifika iha ona, maibe planu Governu hato’o proposta para orsamentu iha ita kee netik fatin sira ne’ebe ita identifika tiha,” hateten Vise Kordenador Komite 12 Novembru, Rogerio da Costa da Cruz, (11/06), iha Balide, Dili.
Kona ba fatin ne’ebe identifika ona, tuir Vise da Crus sira labele fo sai uluk ba publiku antes hahu hala’o atividade kee mate ruin.
“Ne’e segredu husi komite nia servisu hotu, ami nia ema ba buka nafatin informasaun ba fatin ne’ebe mak diskunfia, e ida ne’e sei iha pakote nia laran,”Vise da Crus tenik.
Entertantu Deputadu Mateus de Jesus, dehan mate ruin sira ne’ebe hetan ona tenke halo’ot tanba governu prepara ona fatin iha Metinaro.
“Hau senti katak mate sira ne’ebe mate durante funu hodi liberta nasaun ida ne’e, sira nia ruin la husik hela iha fati-fatin maibe sei halo’ot iha fatin ida ne’ebe mak governu determina,” Deputadu de Jesus tenik.
Iha parte seluk Deputadu Domingos da Costa sublina, mate ruin barak mak to’o agora seidauk hetan.
“Hau rona mos Governu prepara tiha ona fatin ida para mate ruin sira ne’e tau hamutuk iha fatin ida,” Deputadu da Costa dehan.
Nia dehan ,iha Lospalos mate rui barak mak Deputadu Cornelio Gama(L-7) rekolia hamutuk ho komunidade sira aruma hamutuk ona iha kaisaun sira maibe sidauk halot.
“L-7 mos ligasaun ba iha Governu para atu lori ba iha fatin Metinaro tanba ema sira ne’e mate laos tanba sira nia hakarak tanba defende rai ida ne’e atu ukun rasik an,” Deputadu da Costa katak.