- Publika iha: 10 Julho 2012
Iha nasaun sira seluk iha mundu bainhira foin pasa iha konflitu, sempre iha failansu ba iha justisa (justisa la’o ladun diak), maibe diferente ho nasaun Timor-Leste (TL), maske foin pasa konflitu mas hatudu duni justisa ne’ebe justu ba ema hotu.“Iha Timor, mesmu ita foin sai husi situasaun paska konflitu ou postu konflitu, maibe ita haksolok tanba ita nia tribunal sira konsege maneja atu halo julgamentu ba autoridade estadu ne’ebe maka halo korupsaun, ne’e hatudu katak justisa ne’e ba ema hotu,” dehan Diretor Ezekutivu Programa
Monitorizasaun ba Sistema Judisial (JSMP), Luis de Oliveira Sampaio, (29/06), iha Colmera,Dili.
Tuir Diretor JSMP, Sampaio, justisa ba nasaun ne’ebe maka postu konflitu ne’e defisil, e Timor-Leste hatudu duni nia abilidade atu halo igualidade justisa sidadania tomak ne’ebe la halo tuir lei ne’ebe mak vigora. “Ne’e kondisaun ida ne’ebe mak ita hotu tenke orguilhu,”.
Entertantu Vise Ministru Justisa (VMJ), Ivo Valenti dehan alende governu sosiedade sivil mos fo kontribuisaun maka’as ba igualidade jusisa iha rai laran durante ne’e.
“Esforsu ne’ebe maka ita halo durante tinan sanulu nia laran, tantu primeiru governu to’o iha kuatru governu agora dadaun ne’e, hotu-hotu esforsu atu hetan justisa ida ne’ebe hanesan ba ema hotu,” dehan Vise Ministru Valenti.
Tuir nia, justisa la hare ba kor, bo’ot ka kiik, riku ka kiak maibe hanesan ba ema hotu.”ita hare katak, iha membru governu balun ne’ebe komete krimi halo prosesa hotu ba sira, ne’ebe justisa iha rai laran la’o hela,”.