- Publika iha: 10 Julho 2012
Total asidente trafiku ne’ebe akontese durante fulan Junu iha capital Dili hamutuk 43.“Iha semana hirak ne’e nia laran iha kazu asidente hamutuk 43. Kanek kma’an iha 25 pesoas, kanek todan iha 15 pesoas, no ema na’in hitu maka mate,” hateten Komandante Polisia Tranzitu Nasional, Superintendente Antonio L.C. Soares, (28/06), iha Kaikoli, Dili.
Tuir nia, kazu grave liu maka iha Distritu Ermera tanba rezulta ema nain hitu maka mate kedas iha fatin.
“Kareta bo’ot ida husi Dirasaun Dili ba Ermera ne’ebe tula sasan barak no todan, ne’e duni liu kurzamentu baku fila tiha, no rezulta ema nain hitu mate no nia kondutor ne’e halai tiha” dehan Komandante Soares.
Entertantu Membru Parlamentu Nasional, Deputada Josefa Alvares Soares, ho numeru asidente ne’ebe iha, hatudu katak barak duni asidente nebe maka akontese iha Timor-Leste.
“Ema barak maka seidauk kompriende kona ba sinais tranzitu, inklui kondisaun estrada ne’ebe maka at,” dehan Deputada Soares.
Tuir nia, asidente sempre akontese tanba motorista sira la kuidadu aan bainhira halai iha Estrada.
“Dala barak joven sira barak maka lori motor no kareta, la konsidera sira nia moris rasik,” dehan Deputada Soraes.