- Publika iha: 11 Julho 2012
Hafoin tinan tolu halo monitorizasaun ba iha area seguransa no defeza nian, relatoriu lubuk ida mak Fundasaun Mahein (FM) halo kona ba area rua ne’e nian, maibe dezafiu bo’ot bainhira membru husi Instituisaun rua ne’e nunka asesu sira nia relatoriu.“Polisia barak mak sei falta buat barak,e iha ami nia relatoriu ne’e ami hakerek hotu kona ba kondisaun sira ne’e, maibe nai ulun sira la lee, ne’e duni laiha mudansa,” Diretor FM. Nelson Belo, iha serimonia aniversariu FM nian ba datoluk (29/07), iha Balide, Dili.
Tuir nia, iha relatoriu ne’e sira hakerek buat barak kona ba instituisaun rua ne’e, maibe sira la lee, entaun laiha mudansa ne’ebe signifikan ne’ebe sira halo durante ne’e.
Hatan ba kestaun ne’e, Segundu Komandante Polisia Nasional Timor-Leste (PNTL), Komisariu Afonso de Jesus katak, sira sempre lee relatoriu husi FM nian, maibe kondisaun mak nune’e duni.
“Relatoriu sira ne’e ami lee, ami diskuti no hato’o ba ami nia nai ulun sira e ita hotu-hotu hatene katak situasaun sira ne’e ladun favoravel nafatin ba PNTL atu halo sira nia knar, maibe prosesu mak hanesan ne’e, la’os ami la konsidera ba relatoriu hirak ne’e,” hatan Komisariu de Jesus.
Husi parte PNTL nian fo parabens ba FM ne’ebe ho konsiensia atu tau matan ba area seguransa no defeza nian, e PNTL gosta maibe dalabarak prosesu mak tarde.