- Publika iha: 16 Julho 2012
Fundasaun Mahein (FM) sujere ba governu foun mai atu kria departementu ida ba tradusaun lei ne’ebe maioria hakerek ho lian Portugues, liu-liu lei kona ba area seguransa no defeza nian, nune’e membru husi Instituisaun rua ne’e labele viola bainhira halo operasaun ruma.“Iha futuru presiza iha Sekretariu Estadu ka Departementu ida ne’ebe maka iha governu laran, atu halo tradusaun ba lei ka dokumentus ne’ebe maka uja Portugues ba lian Tetun no tenke ofisial,” sujere Diretor Ezekutivu FM, Nelson Belo, iha Balide, Dili.
Tuir nia, durante ne’e membru Polisia Nasional Timor-Leste (PNTL) no Falintil-Forsa Defeza Timor-Leste (F-FDTL) barak mak la hatene kona ba sira nia lei organik ne’ebe mak iha.
Iha biban seluk Deputadu Joaquin Amaral konkorda ho opiniaun husi FM nian, hodi kria departamentu ida ne’ebe maka toma konta ba area tradusaun.
”Hau konkorda, ita presiza duni tradus para ema hotu kompriende, maibe ita mos labele tau ida ne’e hanesan obstaklu bo’ot ida para ita lakoi kompriende lei no lakohi halo tuir lei,” dehan Deputadu Amaral.
Tuir nia, kestaun ne’e importante ne’e duni Governu foun tenki hare no tau matan, atu halo maneira oinsa para komunidade sira ne’e bele kompriende konaba lei sira, se’e la’e halo deit maibe povu barak mak lahatene no viola.