- Publika iha: 26 Julho 2012
Total kazu Violensia Domestika (VD) ne’ebe durante ne’e hahu Janeiru to’o Julhu tinan ne’e, Victim Support Service (VSS) atende no akompanha hamutuk 115 kazus maibe kazus ne’ebe hetan finalidade iha Tribunal.“Ami nia kliente ne’ebe ami atende no akompanha hamutuk 115, maibe husi kazu ne’e foin julga rua iha tribunal ba tinan ida ne’e,” dehan Kordenadora Interinu VSS, Marcelina Amaral, iha Colmera, Dili.
Nia dehan, kazus hirak ne’e balun agora sei iha Ministeriu Publiku (MP) iha hela prosesu investigasaun, maske kleur maibe kontinua.
“Tenke pasensia wainhira hein kleur kona ba prosesu kazu sira ne’e iha tribunal, tanba tribunal distrital ita hare katak loron-loron sempre iha kazu ne’ebe maka tama,” Kordenadora VSS ne’e dehan tan.
Entertantu Deputada Maria Maia Reis,husu atu governu tau atensaun ba kazu Violensia Domestika ne’ebe husi tinan ba tinan aumenta aas, mesmu iha ona lei.
“Hau hanoin atu evita violensia domestika ne’e presiza iha konsiensia husi feto ho mane ne’e rasik, oinsa maka bele rezolve problema ho ulun malirin, mesmu iha lei maibe kuandu laiha konsiensia ne’e hanesan deit,” hateten Deputada Reis.
Deputada ne’e mos apresia ba VSS ne’ebe durante ne’e fo asistensia legal ba vitima violensia domestika to’o hetan finalidade iha Tribunal.