- Publika iha: 06 Agosto 2012
Fundasaun Mahein (FM) ne’ebe maka durante ne’e halo monitorizasaun ba iha area Seguransa no Defeza, ejiji ba Servisu Investigasaun Criminal (SIC) aselera prosesu investigasaun ba kazu matebian Armindo Perreira, no tenke publika ba publiku rezultadu investigasaun ba kazu ne’e.“Ami ejiji ba institusaun polisia atu halo investigasaun lalais ba kazu involvement membru PNTL ne’ebe tiru mate estudante Universidade Dili (UNDIL) Armindo Perreira, no ami mos rekomenda ba komando PNTL tenke fo sai rezultadu investigasaun ba publiku atu nune’e publiku bele hatene,” ejiji Koordenador Peskiza FM, Joao Almeida Fernandes, foin lalais hosi nia eskritorio iha Balide, Dili.
FM mos husu ba lider Partidus Politiku sira atu tuur hamutuk hodi apelu ba publiku relasiona ho konflitu ne’ebe maka akontese iha 15-16 Julho, ne’ebe rezulta Joven ida mate.
Entertantu Diretor Servisu Investigasaun Criminal, Superintendente Xefe Calisto Gonzaga, dehan agora dadaun prosesu investigasaun ba kazu ne’e la’o hela.
“Ami labele determina ida ne’e, atu publika ga la’e, wainhira hetan rezultadu ona maka sei hanoin kona ba ida ne’e, tanba agora dadaun prosesu investigasaun la’o hela, ne’e la’os buat ne’ebe maka fasil, han tempu barak,” dehan Diretor SIC Gonzaga.
Diretor SIC hatutan, SIC mos sei buka dokumentu balun ne’ebe maka sai arkivu, hodi reforsa liu tan prosesu investigasaun, tanba ne’e husu ba komunidade sira atu pasensia oituan.