- Publika iha: 08 Agosto 2012
Programa Monitorizasaun ba Sistema Judisial (JSMP) halo sosializasaun ba Polisia Servisu Investigasaun Kriminal (SIC) no Autoridade Lokal kona ba kazu insestu inklui mos lei violensia domestika (VD), nune’e sira mos iha konesementu kona ba asuntu ne’e.“Husi 2007 to’o agora ami sempre fo formasaun ba polisia Servisu Investigasaun sira, no ba Autoridade Lokal kona ba lei, no oinsa maka sira bele fo tratamentu ne’ebe maka diak ba vitima sira, autoridade no polisia tenke halo saida para vitima sente livre, no oinsa mak fo sai saida maka akontese ba sira,” dehan Diretor Ezekutivu JSMP, Luis Oliveira Sampaio, (01/08), iha Hotel Ramelau, iha Aimutin, Dili.
Tuir nia, buat ne’ebe maka JSMP halo dadauk ne’e, dala barak Governu la halo ou lahanoin hetan, e JSMP hetan tulun husi doadores husi rai seluk, hodi produs relatoriu hodi bele intrega ba Governu hodi bele halo mudansa ba ida ne’e.
Entertantu Membru Polisia SIC ne’ebe lakohi publika nia identidade, sente kontente ho formasaun ne’ebe oferese husi JSMP, tanba ida ne’e nudar edukasaun umana.
“Iha treinamentu ne’e sira hanorin kona ba oinsa trata vitima sira, no kuandu iha prosesu investigasaun nia laran ami tenke koalia ho neneik no labele obriga ou intimida fali sira, atu nune’e sira senti livre ou labele iha tauk,” dehan fonts konfirmadu ne’e.
Nia mos husu ba governu atu halo sosializasaun ba komunidade sira ne’ebe maka hela liu iha area remotas, nune’e bele redus numeru kazu insestu, tanba dala barak kazu ne’e akontese iha area remotas.