- Publika iha: 10 Agosto 2012
Planu Victim Support Service (VSS) atu sai organizasaun independente, oras ne’e dadaun iha faze sosializasaun ba iha komunidade sira.
“Agora dadaun iha prosesu halo sosializasaun, ami fahe ba faze rua; tranzisaun primeiru ami konklui tiha ona iha fulan ida ne’e e ba oin ami hametin sira nia sistema instituisional, lobi doadores buka orsamentu, hari sira nia lei interna inklui mos buka board, se ida ne’e mak akontese duni sei hahu iha fulan Janeiru 2013,” dehan Diretor Ezekutivu Judicial System Monitoring Program (JSMP), Luis de Oliveira Sampaio, (01/08), iha Hotel Ramelau, Aimutin, Dili.
VSS mak nudar organizasaun ida ne’ebe durante ne’e tau matan no fo asistensia legal ba vitima violensai bazeia ba jeneru no labarik asesu ba justisa, VSS rasik agora dadaun sei iha organizasaun JSMP nia okos.
Tuir Diretor JSMP Sampaio, VSS tenke sai Instituisaun ne’ebe independente nune’e bele fo asistensia legal ba vitima violensia bazeia ba jeneru inklui mos ba labarik sira, tanba durante ne’e sira seidauk hetan justisa ne’ebe justu.
Iha parte seluk Reprezentante Komisaun Nasional Direitu Labarik (KNDL), Madalena Guterres hateten ne’e planu ne’ebe positivu tebes, nune’e sira bele halo nia knar bazeia ba situasaun real ne’ebe akontese, laiha intervensaun husi parte seluk.
“Se ita hela iha ministerio ida nia okos susar tebes ba ita atu hato’o opiniaun ba buat ruma sempre hetan intervensaun husi organizasaun ne’ebe ita iha ba, maibe se ita sai indepedente ita livre hato’o ita nia hanoin no hala’o knar tuir situasaun ne’ebe akontese ne’e pasu ne’ebe diak tebes ba VSS,” dehan reprejentante KNDL ne’e.*