- Publika iha: 14 Agosto 2012
Fundasaun Mahein (FM) ne’ebe maka durante ne’e, halo monitorizasaun ba Seguransa no Defeza, husu ba Instituisaun Polisia Nasional Timor-Leste (PNTL) atu publika rezultadu Operasaun Konjunta hodi rekolha kilat iha komunidade sira iha 2008 hafoin krizi military 2006.“Komunidade barak mak sei preokupa e sira hanoin agora dadaun sei iha kilat illegal, ne’e duni Polisia no Sekretariu Estadu Seguransa presiza halo audit ba kilat sira ne’e ho transparansia, kilat hira mak rekolha ona nune’e labele hamosu perguntas bo’ot ba publiku,” sujere Kordenador Peskiza FM,Joao Almeida Fernandes, (06/08), iha Balide, Dili.
Kordenador FM ne’e mos husu ba governu foun atu kria politika ida kona ba manajementu kilat no ekipamentu seluk ne’ebe iha Instituisaun PNTL laran.
Entretantu II Komandante Jeral PNTL, Komisariu Afonso de Jesus, hateten iha tempu operasaun konjunta, rekolha kilat barak e PNTL publika ona no komunidade barak hatene.
“Kona ba kilat no kilat rakitan ne’ebe maka rekolha, hau hanoin liu husi operasaun konjunta ita rekolha barak los, no bainhira hala’o ida ne’e ami informa ba komandante distritu sira mai, no sasan sira ne’e musnahkna balun, no balun rai sai evidensia, no hau hanoin komunidade hatene kona ba ida ne’e tanba media fo sai, keta ida rua deit maka la hatene karik,” dehan Komisariu de Jesus.
Komisariu mos garante katak agora laiha ona kilat illegal iha komunidade nia le’et, so ke kilat rakitan tanba ne’e ema halo rasik iha kualker tempu. “Maibe ami informa ona ba komunidade katak asaun halo rakitan ne’e krimi,” Komisariu ne’e katak.