Ekipa Taskforce Prevensaun COVID-19 Halo Operasaun Ba Lojas

Ekipa taskforce prevensaun surtu COVID-19 munisipio Dili servisu hamutuk ho polisia komando munisipio Dili halao operasaun sai tama loja sira hodi hare direitamente implementasaun protokolu Organizasaun Mundial Saúde (OMS) nian ba prevensaun surtu COVID-19 hanesan disponibilidade fasilidade fase liman, asegura ema hotu utiliza maskara no mantein distansia fisiku.

Diretóra servisu saúde munisipio Dili, Agustina Segurado hateten ekipa halo ona sensibilizasaun beibeik, maibe sidadaun balun lakohi kumpri media prevensaun sira tanba ne’e sira kopera ho polisia atu bele apoia.

“Ohin ne’e ita konsentra ba loja sira tanba ita hatene movimentu iha fatin sira ne’e makas tebes entaun ita tenke hare asaun sira ne’ebe presiza atu halo prevensaun hanesan tenke tau bee no sabaun iha loja oin, ema hotu tenke uza maskara, no mantein distansiamentu,” nia hateten bainhira halao operasaun konjunta ba loja sira iha kapital Dili.

Nia dehan, sira identifika loja balun la prepara fasilidade fase liman, laiha distansia no visitante sira la uza maskara tanba ne’e sira fo xamada no obriga sira tenke prepara bee fase liman no tenke asegura ema hotu ne’ebe tama ba loja laran fase ona liman.

Nia hatutan, ekipa taskforce ne’e sei halao operasaun rutina ba loja sira no sira ne’ebe la kumpri autoridade seguransa sei halo kapturasaun no prosesu tuir dalan legal.

Entretantu, Presidente Autoridade Munisipio Dili, Gaspar Soares hateten ema hotu ne’ebe la kumpri regas prevensaun COVID-19 mak autoridade seguransa sei halo kapturasaun no prosesa tuir dalan legal.

“Loja nain sira tenke iha serteja katak ema sira ne’ebe ba loja fase liman, uza maskara no distansiamentu sosial. Ba se deit mak la kumpri, liu-liu lakohi fase liman, la uza maskara mak polisia sei foti medidas no sei prosesu iha ministerio publiku,” nia hateten.

Nia dehan, dekretu governu no 21/2020 hateten ema hotu obrigatoriomente tenke fase liman ho sabaun, uza maskara antes tama ba loja laran no mantein distansiamentu tanba ne’e loja nain sira tenke prepara kondisoens fasilidade fase liman iha loja oin.

Iha parte seluk, Segundu Komadante Polisia Munisipio Dili, superintendente Euclides Belo hateten polisia munisipio Dili prontu apoia ekipa taskforce atu ezekuta dekretu governu no 21/2020 kona ba medida prevensaun COVID-19.

“Hau espera ita nia komunidade sira barak mak hetan ona informasaun tanba ne’e husu atu kumpri. Se la kumpri mak ita sei foti medida hasoru, maibe importante agora mak ita husu komunidade sira hakarak lakohi, simu ou la simu, gosta ou la gosta regras tenke kumpri,”nia hateten.