- Publika iha: 19 Abril 2022
Tuir dados husi Polisia Nasional Timor-Leste (PNTL) hatudu katak ema nain 10 mak lakon vida iha fulan Marsu 2022 tanba asidente no insidente ne’ebe akontese iha teritorio laran.
Portavoz PNTL, Superientendente Xefe Armando Monterio, hateten ema nain 10 ne’ebe lakon vida ne’e komposto husi asidente nain 6 no insidente inklui oho malu, nain 4.
“Asidente 7 ne’e akontese iha Baucau, Dili no Bobabaro, no insidente 3 ne’e akontese iha Ainaru, Manufahi no Baucau,” Superientedente Xefe Monteiro informa.
Nia dehan, asidente no insidente sira ne’ebe akontese ne’e tanba hemu lanu mak kondus kareta no motor depois monu nune’e mos hemu lano koalia ideia la kona malu ikus mai mosu problema no balun sai vitima.
“Autor sira ne’ebe mak komete iha kazu insidente iha munisipio Ainaru no Manufahi ne’e ita kaptura ema hamutuk nain 5 no submete ona ba prosesu [legal] oras ne’e dadaun iha ona prizaun preventiva,” nia salienta.
Entertanto Komandante Munsipiu Manufahi Superientendente Joni Viana hateten, insidente ne’ebe akontese iha postu Turiskai munisipio Manufahi hodi rezulta ema nain rua mate fatin ne’e tanba hadau malu rai.
“Autor ba kazu refere oras ne’e dadaun iha ona prizaun preventiva iha Dili hodi responde ba hahalok krimi ne’ebe mak sira komete,” nia dehan.