PNTL Halo Operasaun Espesifiku Ba Karreta Motorizada Iha Trotoar

Polísia Nasional Timor-Leste (PNTL) halo operasaun espesífiku hodi kontrola karreta no motorizada ne’ebé mak halo movimentu ka para iha trotoar leten iha dalan públiku.

Segundu Komandante Jeral PNTL, Komisariu Pedro Belo hatete karreta no motorizada ne’ebé para no movimentu liuhusi trotar leten, ne'e krime tanba kontra lei kódigu estrada númeru 6/2003.

Nia dehan, iha lei kódigu estrada la autoriza karreta ka motorizada para ka halo movimentu iha trotoar leten, tanbe dalan ne’e ba ema la’o ain sira.

"Ita orienta ona komandu polísia Munisípiu Díli ho Tránzitu atu halo operasaun espesífiku hodi kontrola karreta no motorizada para ka halo movimentu iha trotoar leten," Komisáriu Belo dehan.

Nia dehan tenke haree fila fali tanba motorista sira komesa laiha disiplina hodi para karreta no motorizada, para arbiru de’it no la fó espasu ba ema la’o ain sira hodi utiliza trotoar leten.

"Ita presiza haree asuntu ne'e ho sériu tanba ne'e fo risku ba ema nia vida, bainhira fatin ba ema la’o ain, karreta motorizada para no halo hotu movimentu, no ema la’o ain tenke tuun hotu ba estrada klaran," nia salienta.

Nia dehan, dala barak ema uza trotoar ne’e, para fali karreta no motorizada, tuir regra karreta tenke para iha nia fatin, nune’e mós motorizada, trotoar ne’e ema atu la’o ain.

Entretantu, Komandante PNTL Munisípiu Díli, Superintendente Xefe Natercia Martins, hatete nia parte koordena ho Komandante Tránzitu Seguransa Rodaviáriu Nasional prontu hodi hatun efetivu halo pasa-revista ba karreta no motorizada ne’ebé para la tuir regra tránzitu.

“Tanba polísia implementa lei no orden no impoin disiplina bainhira ema la kumpri regra ruma,” nia dehan.

Tanba ne'e polísia sei aplika multa tuir tipu infrasaun ne’ebé sira halo no polísia sei la nonok tanba ne'e husu populasaun atu kumpri, bainhira atu para ka halo movimentu karreta motorizada iha dalan publiku.