PNTL Aplika Multa Ba Motorista Ne’ebé Ko’alia Telefone Bainhira Movimentu

Polísia Nasional Timor-Leste (PNTL) aplika multa tuir lei kódigu estrada ba motorista sira ne’ebé mak indetifika ko’alia telefone, bainhira kondús transporte ka halo movimentu iha dalan públiku.

Segundu Komandante Jeral PNTL, Komisáriu Pedro Belo dehan, motorista sira ne’ebé mak bai-bain halo hela movimentu no ko’alia telefone ne’e, kontribui ba asidente, tanba la fokus ba dalan.

“Ita tenke aplika multa tuir tabela infrasaun, bainhira ita identifika sira halo movimentu lori ko’alia telefone tanba ne’e risku ba ema nia vida nune’e mós kontra lei kódigu estrada númeru 6/2003,” nia dehan.

Nia dehan, antes ne’e aplika ona multa infrasaun ba motorista hamutuk na’in lima (5) ne’ebé ko’alia telefone bainhira halo movimentu, nune’e mós motorista hirak ne’e balun konsegue soke ema maibé la mate, kanek de’it.

“Dadaun ne’e ita-nia tránzitu sira hamoris fila fali servisu kontrolu ba motorista sira ne’ebé mak koalia telefone ka halimar telefone bainhira halo movimentu tula pasajeiru, tantu transporte publiku ka privadu,” Komisariu Belo hatete iha Kaikoli.

Alende ne’e, mós orienta tránzitu sira kontrola ema lanu ten sira ne’ebé mak kondús karreta no motorizada halai arbiru, iha fimdesemana, nune’e mós halai tama jardim sira arbiru hodi estraga fasilidade sira.

Entretantu, pasajeira Olandia Ximenes dehan, motorista ba motorizada no karreta sira halo movimentu hodi koalia telefone ne’e fó amiasa ba pasajeira sira-nia vida liu-liu ba transporte publiku sira.

“Ita haree esperiénsia sira-ne’e liu ona, ezemplu bus diresaun Díli-Lospalos ne’ebé hetan asidente iha Subaun no ema barak mak lakon vida, barak mós tohar no kanek ne’e tanba kauza husi motorista lori karreta, koalia telefone nune’e mós sibuk ba sunu sigarru,” nia dehan.

Tanba ne’e husu polísia tenke tau atensaun sériu ba asuntu sira-ne’e, atu nune’e labele akontese tan, atu halo prevensaun presiza iha sosializasaun ba motorista sira, no tenke kontrola másimu.