Komandante Polísia Díli Foun Sei Hadia Jestaun Operasaun

Komandante Polísia Munisípiu Díli foun, Superientendente Xefe Orlando Gomes dehan, tenke hadia jestaun operasaun hodi halo prevensaun sedu ba krime sira ne’ebé mosu iha kapital Díli, tanba durante ne’e polísia sempre to’o tarde iha fatin akontesimentu.

Nia dehan, polísia mak autor ba seguransa hodi halo prevensaun, maibé presiza mós kontribuisaun husi komunidade no autoridade, joven, veteranus sira hamutuk hodi kombate krime ne’ebé mosu iha Díli laran.

“Ita hotu servisu hamutuk, ha’u fiar katak Díli ne’e bele hakmatek,” Komandante Gomes dehan, iha Kuartel Jeral PNTL, Díli.

Tanba ne’e nia dehan, atu prevene kazu krime iha kapital Díli laran hanesan komandante munisípiu Díli foun tenke hadia jestaun operasaun nune’e bele envolve komunidade no autoridade lokal sira hotu.

“Ita kontinua nafatin hasa’e volume no trasa planu operasaun iha Díli laran ita sei servisu hakaas an hodi garante situasaun hakmatek liuhusi esforsu ema hotu nian, la’ós polísia de’it,” nia informa.

Entretantu Diretór Ezekutivu Fundasaun Mahein (FM), Nelson Martins, dehan dadaun ne’e kazu krime komesa buras iha kapital Díli, liu-liu kona-ba asaltu iha tempu kalan, kazu burla sira, ida ne’e halo komunidade la seguru halo movimentu iha tempu kalan.

“Ita husu komandante Polísia Munisípiu Díli foun, atu halo prevensaun ba kazu krime hirak ne’e presiza reforsa servisu informasaun,” nia hatete.

Tanba ne’e nia dehan, fiar katak komandante foun ne’e iha meiu oin-oin hodi halo prevensaun ba kazu krime tanba, antes ne’e lidera ona Unidade Espesial Polísia (UEP) ne’ebé mak durante fó apoiu seguransa másimu loos ba komunidade.