- Publika iha: 20 Julho 2023
Polísia Nasional Timor-Leste (PNTL) liuhusi Servisu Investigasaun Kriminál (SIC) prende kilat manu hamutuk 21 iha suku Mau-Metan, iha munisípiu Liquiçá, tanba tama ilegál mai Timor-Leste husi nasaun viziñu Indonezia.
Portavós PNTL nian, Superientendente Antonio da Luz dehan kilat manu refere prende liuhusi operasaun ne’ebé mak SIC no komandu polísia munisípiu Liquiçá realiza iha dia 17 kalan.
“Liuhusi operasaun ne’e mak ita konsegue prende kilat manu hamutuk 21 ne’ebé mak hatama ilegál husi fronteira mai iha Munisípiu Liquiçá,” nia dehan.
Nia dehan, aleinde halo aprensaun ba evidénsia kilat 21 ne’e, polísia mós prende motorizada rua, no kaptura suspeitu na’in-tolu ne’ebé hatama kilat ilegal refere husi fronteira.
“Evidénsia hirak ne’e ita prosesu ona ba iha Ministériu Públiku hodi bele kontinua prosesu tanba sira mak nain ba prosesu,” Superientedente Luz dehan iha Kuartel Jeral, Díli.
Nia dehan, evidénsia no suspeitu na’in tolu tenke prosesu tanba sira komete krime kontrabandu.
Entretantu, Komandante Polísia Munisípiu Liquiçá Superientendente Xefe Umbelina Martins dehan, durante ne’e atividade operasaun ne’ebé mak sira realiza hodi kontrola atividade ilegál hotu, bainhira atravesa ona husi fronteira.
“Ami la’ós prende kilat ne’e de’it maibé ami prende mós atividade kontrabandu seluk tan hanesan, sigarru, minarai, no ami prosesu ona ba ministéiru públiku no ami la halo publikasaun,” nia dehan.
Nia dehan, Komandante Jeral mak fó orden atu koalia kona-ba krime kontrabandu kilat ilegál ne’e tanba sensitivu oituan no tenke koalia ba públiku atu nune’e sosiadade bele hatene.
“Ami mós servisu hamutuk ho Unidade Polísia Maritima (UPM) no Unidade Patrolhamento Fronteira (UPF) hodi apoiu kontrolu ba minarai sira ne’ebé sidadaun sira tama ilegál husi tasi, no sasan ilegál seluk tama husi fronteira terestre. Ami konsegue halo aprensaun no prosesu,” Komandante Xefe Martins dehan.