- Publika iha: 20 Julho 2023
Menus rekursu iha Unidade Patrolhamento Fronteira (UPF) kontribui ba atividade movimentu ilegál iha fronteira terestre entre Timor-Leste ho Indonezia.
Portavós Komandu Polísia Nasional Timor-Leste (PNTL), Superientendente Antonio da Luz dehan atividade movimentu ilegál ne’ebé kontinua aumenta iha fronteira tanba menus rekursu atu koloka iha postu fronteira nian hodi kontrola entrada ilegal sira.
“Ita hotu hatene katak lina fornteira ne’e luan tebes, ho ita-nia rekursu ne’ebé limitadu hodi koloka kontribui tebes ba atividade ilegál iha fronteira terestre,” nia informa.
Maibé nia dehan, polísia esforsu nafatin, oinsá reforsa servisu kontrolu ne’e, maibé husu mós apoiu rekursu atu bele fasilta membru Unidade Patrolhamento Fronteira (UPF) sira atu kontrolu di’ak liutan.
“Ita haree katak UPF iha postu ne’ebé barak no distansia ne’ebé luan tebes, ita presiza membru barak atu bele halo servisu,” Superientendente Luz dehan.
Tanba ne’e nia dehan, PNTL iha ona planu atu bele reforsa servisu kontrolu iha fronteira.
“Ita mós espera katak iha tinan oin bele tau ona orsamentu hodi halo rekrutamentu ba membru PNTL foun, nune’e bele aumenta rekursu ne’ebé menus hodi reforsa servisu kontrolu iha fronteira, la’ós de’it rekursu umanus maibé materiál mós,” nia esperansa.
Maibé nia dehan, seguransa iha fronteira atu metin presiza kontribuisaun ema hotu nian, tantu autoridade lokál, komunidade, tanba atu garante de’it ba polísia susar atu rezolve problema iha fronteira.
Entretantu, Diretór Ezekutivu Fundasaun Mahein (FM), Nelson Martins, dehan atu prevene atividade tama ilegál iha fronteira presiza kria merkadu livre iha fronteira.
“Atividade entrada ilegál akontese iha fronteira tanba komunidade ne’ebé hela fronteira ne’e nesesidade bázika, no depende liuba iha nasaun viziñu, tanba asesu besik no lalais, maské sira hakat ilegál,” nia dehan.
Tanba ne’e governu foun presiza tau atensaun kria merkadu iha lina fronteira, hodi fasilita komunidade, no polísia sira nafatin koloka hodi halo kontrolu de’it.