- Publika iha: 29 Agosto 2023
Komandu Polísia Nasional Timor-Leste (PNTL), salienta presiza dezenvolve área prioridade lima (5) inklui Unidades Patrollamentu Fronteira (UPF), Tránzitu, Investigasaun, Informasaun, no Polísiamentu Komunitáriu.
Segundu Komandante Jerál PNTL, Komisáriu Pedro Belo, hatete área sira refere ne'e importante tebes ba governu atu tau atensaun hodi bele rezolve sira-nia problema ne’ebé durante ne'e sira enfrenta, liuliu ekipamentu, postu, no rekursu umanu.
"Ita husu Ministériu (MI) Interiór atu bele tau atensaun hodi dezenvolve área prioridade 5,” Segundu Komandante Jerál Belo dehan iha knaar fatin Kaikoli, Díli.
Nia dehan, área sira ne'e dezenvolve liuhusi kria kondisaun, kapasitasaun, no kompleta ekipamentu ho modernizasaun sira atu bele fasilita PNTL nia servisu hodi halo prevensaun No. responde ba krime sira iha rai laran.
"Problema hirak ne'e ita halo ona planu hodi aprezenta ba governu atu bele responde ho sériu," nia informa tan.
Enkuantu kona-ba rekrutamentu membru foun ba PNTL, sira mós aprezenta ona planu ba governu no governu mós iha politika rasik katak sei bele realiza iha tinan oin 2024.
Entretantu, Ministru MI, Fransisco Guterres, dehan atu hadia kualidade institusionál PNTL nian tenke reve hotu lei sira atu nune'e sai hanesan matadalan hodi kria kondisaun ba sira.
"Ita sei reve hotu kedan lei PNTL nian, atu bele fó estatutu ne’ebé mak dignu ba sira hodi bele halo servisu kumpri orden no serbí povu no nasaun ida-ne'e ho di’ak," Ministro Guterres dehan.
Tanba ne'e nia dehan, iha nonu governu ne'e sei esforsu hodi kria kondisaun ba polísia No. kompleta ekipamentu nune'e hadia profesionalizmu membru PNTL nian.