- Publika iha: 29 Agosto 2023
Militár husi nasaun lima (5) inklui Amérika, Austrália, Nova-Zelándia, Japaun, no Timor-Leste realiza ezersísiu harii hamutuk ho karakter apoiu umanitáriu nian iha Timor-Leste.
Xefe Estadu Maior Falintil Forsa Defesa Timor-Leste (F-FDTL), Tenente Jeneral Domingos Raul “Falur Rate-Laek” dehan, ezersísiu harii hamutuk hodi hametin interoperabilidade entre forsa partisipante sira, hasa'e kapasidade komun liuhusi kooperasaun ho nasaun sira iha rejiaun, hodi preparasaun ba kombate operasaun kompleksu sira.
Tanba ne'e nia dehan, ezersísiu ne'e ho karakter apoiu umanitáriu no identifikadu ona iha área 13 iha territóriu laran liu-liu iha área sivíl nian.
"Ita-nia ezersísiu hamutuk ne'e realiza entre militár nasaun lima ne’ebé kompostu forsa Amérika na’in 19, forsa Austrália 65, forsa Japaun 13, forsa Nova-Zelandia 4 no F-FDTL na’in 130," Jenerál Falur dehan.
Nia dehan, ezersísiu refere realiza durante fulan ida hodi realiza atividade 13 ne’ebé identifika ona ho karakter apoiu umanitáriu hanesan, hadia konstrui postu iha fatin istóriku sira, apoiu konstrusaun ba eskola, saúde, bee moos ba komunidade no seluk tan.
"Ha’u hakarak agradese ba komandante sira husi Austrália, Estadus Unidus Amérika, Nova Zelandia no Japaun, ba sira-nia komitmentu hodi realiza atividade sira iha ezersísiu harii hamutuk ne'e," nia dehan.
Nia dehan, dala ida-tan, obrigadu ba militár Forsa Armada Austrália, Forsa Estadus Unidus Amérika, Forsa Nova-Zelándia, Forsa auto-defeza Japaun, hamutuk ho forsa F-FDTL.
Enkuantu nia dehan, ezersísiu refere ho envolvimentu bilaterál no multilaterál, sei hasa'e komprensaun no hametin konfiansa.
"Ha’u hein katak oportunidade sira hanesan ne'e bele kontinua atu ita serbisu hamutuk hodi rezolve problema sira ne’ebé ita nia nasaun ida-idak hasoru. Ha'u hakarak hatete katak husi F-FDTL nakloke ba kooperasaun, servisu hamutuk, dezenvolve hamutuk, no lansa projetu inovadór foun sira ho rai belun hotu-hotu," nia salienta.
Entretantu, Enkaregadu Negósiu Estadu Unidus Amérika, Marc Weinstock, hatete Estadus Unidus Amarika kompromete atu mantein kooperasaun iha área defeza no seguransa ho F-FDTL.
“Estadus Unidus Amérika komprometidu ajuda Timor-Leste hodi hasa'e Timor-Leste nia kapasidade militár hodi asegura ninian fronteira sira,” nia dehan.
Iha fatin hanesan, Embaxadora Austrália iha Timor-Leste, Caitlin Wilson, hatete Austrália iha komitmentu atu kontinua hametin kooperasaun ho Timor-Leste liuhusi ezersisiu harii hamutuk inklui kontinua kapasita militár F-FDTL iha Língua Inglés.
Nia dehan Austrália ho Timor-Leste nu’udar belun di’ak tanba ne’e kontinua sei haforsa kooperasaun.