- Publika iha: 02 Setembro 2023
Komandante Tránzitu Seguransa Rodaviaria Nasionál, Superientendente Asistente Luis da Costa, dehan hahú husi fulan Jeneiru to’o Agustu 2023, unidade tránzitu rekolla resita hamutuk $390.000 resin husi infratór sira iha territóriu laran.
Nia dehan, reseita hirak ne’e rekolla husi tipu infrasaun inklui asesores motorizada no kareta la kompletu, dokumentu la iha, SIM la iha, la utiliza helem, kontra orden autoridade ,nune’e mós para sala.
“Husi tipu infrasaun hirak ne’e mak hahú husi fulan Janeiru to’o Agustu ne’e ita rekolla reseita husi infratór sira hamutuk $390.000 iha territóriu laran,” Komandante Costa dehan.
Nia dehan, reseita hirak ne’ebé sira rekolla no kontribui ona ba kofre estadu tanba polisia la rai iha komandu.
“Ita halo aprensaun ba viatura sira ne’ebé mak kontra lei kódigu estrada, ita fó kedan kuitansi/resibu hodi ba selu multa iha banku tuir infrasaun ne’ebé nia komete depois lori resivu mai mak foin bele foti sira-nia kareta ka motorizada ne’ebé mak ita asegura,” nia dehan.
Enkuantu nia dehan, ba sira ne’ebé selu ona polísia fó fila ona sira-nia viatura no sira ne’ebé seidauk selu iha banku polísia asegura nafatin hela viatura iha komandu.
Iha parte seluk, Diretór Ezekutivu Fundasaun Mahein Nelson Belo dehan, durante ne’e polísia nia kontribuisaun ba estadu bo’ot tebes liuhusi reseita nune’e mós seguransa, maibé kondisaun mínimu ba sira-ne’e seidauk di’ak.
“Ita husu ba governu karik bele liuhusi reseita ne’ebé mak polísia kontribui bele utiliza hodi hadia sira-nia kondisaun servisu, kompleta ekipamentu modernu sira hodi moderniza instituisaun Polísia Nasionál Timor-Leste,” nia sujere.
Nia hatete, fulan-fulan polísia hatama reseita ba kofre estadu ne’e bo’ot tebes maibé, tanba saida mak labele hadia sira-nia kondisaun, nune’e mós halo kapasitasaun ba sira hodi aumenta sira-nia profesionalizasaun servisu iha terenu.