- Publika iha: 07 Setembro 2023
Diretór Ezekutivu Fundasaun Mahein (FM), Nelson Belo, dehan atuasaun utiliza forsa husi Polísia Nasional Timor-Leste (PNTL) preve tiha ona iha lei, katak uzu forsa ba intervensaun saida de’it tenke tuir regra no nia mekanizmu ne’ebé mak iha, maibe nia salient tenki ho profisionalismu.
"Liga ba kazu sira ne’ebé akontese ne'e Fundasaun Mahein apoiu PNTL uza forsa hodi halo atuasaun ba kriminozu sira, maibé tenke ho profisionál," Diretór Belo dehan iha knar fatin, Díli.
Nia dehan, uza forsa hasoru kriminozu kona-ba saida de’it ne'e hanesan ultimu rekursu ba atuasaun saida de’it ne’ebé nesesáriu.
Tanba ne'e husu ba polísia utiliza matenek esperiénsia ne’ebé iha antes halo intervensaun.
"Ita fiar katak polísia sei halo knar ho profisionál, tanba sira treinadu no mekanizmu uza forsa ne'e tuir regra," nia salienta.
Entretantu, Segundu Komandante Jerál PNTL Komisáriu Pedro Belo hatete liga ba akontesimentu sira ne’ebé akontese iha área balun iha kapital Díli laran no munisípiu sira polísia fó ona ultimatu ba autór hirak ne'e maibé konflitu kontinua akontese.
"Ita nafatin fó atensaun ba kriminozu sira labele koko buka moras, tanba polísia iha meiu barak hodi halo intervensaun ba aktu krime sira," nia informa.
Komisáriu Belo apelu ba joven sira haree foku ba estudu hodi hadia idaidak nia futuru, nune'e mós nasaun nian futuru labele lakon tempu ba hahalok kriminozu sira tanba laiha valór ba moris.