- Publika iha: 03 Abril 2024
Komandante Polísia Nasional Timor-Leste (PNTL), Eskuadra Dom Aleixo, nia Inspetór Polísia Alexandrino da Costa (Alex Samurai) apela ba reprezentate sira Grupu Arte marsiais sira atu halo koordenasaun diak ho autoridade lokál no PNTL hodi garante seguransa ba membru sira nia organizasaun ne’ebé mate.
Inspetór Alexandrino da Costa dehan, hanesan seguransa estadu nian apela nafatin ba komunidade, katak kuandu mate isin sira ne’ebé envolve an iha arte marsiais, favór tenke iha liña koordenasaun ho autoridade lokál nomós autoridade seguransa atu bele halo seguransa ba mate isin refere nune’e labele mosu konflitu ruma.
Nia hatutan, beibeik ona, akontese, membru arte marsiais ruma mate iha ospitál, sira ba hein iha ospitál hodi hasai mate isin ne’e sira akompaña, entaun iha dalan sira provoka malu, ikus problema mosu, ema seluk mak sai vítima, hanesan kazu Beto komunidade foin lais mak sai vítima.
“Ha’u hanoin kazu sira hanesan ne’e la'ós de'it eskuadru Dom Aleixo nia responsabilidade. Ida-ne’e ita hotu nia responsabilidade. Seguransa loloos ne’e husi ita-nia an rasik, sai husi ita-nia uma, sai husi ita-nia família atu nune’e sai ba li'ur, oinsá atu bele asegura ita-nia an. La presiza tenke asegura husi seguransa estadu hodi akompaña nafatin ita. Konsiénsia ita-nian rasik no ita-nia mentalidade ne’ebé di'ak,” nia dehan iha servisu fatin Eskuadru Dom Aleixo, Comoro, Díli.
Nia salienta, Timor-Leste labele beibeik hanesan ne’e, ema na'in rua mak baku malu ida-ne’e buat ketak ida, kuandu intensaun ba grupu arte marsiais ka arte rituais maka intensaun atu halo konfrontu ba malu, ne’e labele la tolera, tanba ne’e parte seguransa sei la tuur nonook hodi halo prevensaun ba konflitu sira-ne’e.
Iha fatin hanesan Xefe Suku Madohi, Bernardino de Cristo Fereira, hateten la'ós arte marsiais mak halo, maibé pesoál ida ne’ebé arrogánsia mak halo buat ne’e, bele konsidera sira ida autór bolu dehan ema ne’ebé provokadór, la'ós arte marsiais, tanba liuhusi organizasaun ne’e bele eduka ema sai edukadu la'ós atu sai kriminozu.
“Ha'u hatete loloos de'it, arte ne’e tuir loloos ne’e di'ak, maibé ema ne’ebé tama arte marsiais ne’e mak la di'ak. Ne’e mak ha'u hameno beibeik, iha partikulár iha publikamente ha'u bolu beibeik maun sira-ne’e para atu hanorin sira sai nu'udar ema, ho filozofia arte ida ne'ebé mak sira bele adapta,” nia salienta.
Nia mós rekoñese, labele sira mesak, labele Autoridade lokál mesak, maibé sira ho autoridade lokál hamutuk ho seguransa sira hotu, labele fó sala organizasaun, maibé fó sala ba pesoál, ida-ne’e mak kriminozu subar iha organizasaun nia laran presiza buka.