- Publika iha: 11 Julho 2011
Membru Unidade Polisia Fronteira (UPF) suku Saburai infrenta menus transporte atu kontrola fronteira, tanba ne’e sira husu apoiu kuda, maibe tuir Komandante Xefe Lojistika Nasional, Asistente Superintendente Bazilio de Jesus, katak ladun efisiente bainhira uja kuda halo patrulla.
Razaun membru UPF iha postu Saburai husu kuda tanba fatin ne’e izoladu, estrada laiha no motor-kareta labele asesu to’o iha fatin ne’eba, maibe ho kuda bele halo patrulla iha fronteira Saburai ne’ebe baliza kedas ho Suku Builalu, distritu Atambua,Belu.
“Ita bele sosa kuda, maibe hau hanoin sosa kuda ba iha fronteira ladun efisiente, tanba ita tau kuda rua deit bele difikulta ema atu halo patrulhamentu iha ne’eba,” hateten Bazilio de Jesus semana kotuk iha nia knar fatin Kuartel Jeral PNTL Kaikoli, Dili.
Bazilio afirma, iha 2003, komando sosa ona kuda 30 hodi fahe ba postu UPF 27,iha Covalima, Bobonaro, Oe-Cusse maibe kuda hirak ne’e barak mak mate ona. “Agora kuda sira ne’e hela deit Bobonaro 2, Covalima 3 inklui distritu Oe-Cusse,”.
Maske nune’e tuir nia, kestaun ne’e Komando Jeral PNTL hato’o ona proposta ba iha Sekretariu Estadu Seguransa e nia aprova.
“Ita hein bainhira debate orsamentu estadu karik proposta ne’e bele pasa iha Parlamentu Nasional,e iha 2012 ita bele sosa tan kareta balun ho motorizadas ba iha ita nia Policia Fronteira, nia dehan.
Entretantu komunidade husi Distritu Bobonaro ne’ebe hela iha Dili, Rogerio da Luz, katak komando presiza ta atensaun ba UPF sira iha fronteira tanba sira mak lutu ba nasaun.
“Presiza sosa tan kareta,motorizadas ba sira nune’e hafasil sira halo patrulla ba fronteira ho diak liu tan,”nia husu.
Tuir nia, fronteira Disritu Covalima, Bobonaro no Oe-Cusse la’os rai klo’ot, maibe rai luan ne’ebe presiza aumenta membru UPF.