- Publika iha: 29 Janeiro 2013
Organizasaun Rede Feto konsidera atendementu ne’ebe durante ne’e Ministerio Solidaridade Sosial (MSS) fo ba labarik vitima husi Violensia Domestika (VD) seidauk masimu tanba asistensia hotu sei sentraliza deit iha nasional.“Asistensia direita no indireita hanesan asistensia seguransa, medikamentus, uma mahon no alimentasaun seidauk masimu tanba iha distritu laiha, sira tenke hatama sira nia pedidu mai iha nasional mak foin lori ba,” dehan Diretora Ezekutivu Rede Feto, Jacinta Luzinha, (15/01), iha Kaikoli, Dili.
Tuir nia, vitima VD iha distritu barak mak seidauk hetan asistensia husi governu e vitima sira ne’e la’os deit feto maibe mos labarik sira.
Atu hatan ba preokupasoens ne’e MSS dezenvolve ona mata dalan ida kona ba asistensia no protesaun ba vitima violensia bazeia ba jeneru no agora halo ona sosializasaun ba iha komunidade sira.
Nia dehan, iha mata dalan ne’e klarifika klaru ona katak govenru iha obrigasaun atu fo asistensia ba vitima indireita no direita ba vitima violensia bazeia ba jeneru, liu-liu labarik minoridade sira.
“Governu iha obrigasaun atu foti alternative tuir interese labarik nian, signifika katak labarik sira ne’e labele hela iha uma mahon ho tempu ne’ebe naruk tanba sira tenke eskola entaun governu tenke fo protesaun ba labarik ne’e tuir interese labarik nian (menitipkan labarik ba familia besik hodi tau matan no governu supporta alimentasaun deit),” dehan Diretora Rede Feto ne’e.
Hatan ba kestaun ne’e, Ministra Isabel Guterres katak, asuntu ne’e MSS tau ona iha sira nia orsamentu no sei esforsu maka’as servisu hamutuk ho organizasaun non governmental sira hodi fo asistensia ne’ebe diak no kualidade ba vitima VD sira liu –liu labarik minoridade sira tantu indireita no indireita.
“Hau labele fo sai montante orsamentu iha ne’e tanba hau tenke hare fila fali hau nia dadus ne’ebe iha,” dehan Ministra Guterres. n